Слет молодых педагогов

“СунАМП” иккис тыына

Сунтаар улууһугар олунньу 16-17 күннэригэр, оройуон эдэр педагогтарын I-кы түмсүүтэ үрдүк таһымнаахтык тэриллэн ааста!

«Сунтарская ассоциация молодых педагогов» түмсүү, Сунтаар улууһугар аан маҥнай 10 сыл анараа өттүгэр төрүттэммитэ уонна бастакы бэрэсэдээтэлинэн Сунтаардааҕы политехническэй лицей-интернэт английскай тылын учуутала Никитина Сардаана Константиновна талыллыбыта. Онтон быйылгаттан саҥа састаабын актива тэриллэн, иккис тыын ылан, 100-тэн тахса эдэр учууталлары уонна иитээччилэри бииргэ түмэн, бэйэтин үлэтин улахан туһалаахтык саҕалаата!

Слет маҥнайгы күнэ Аллыҥа сэлиэнньэтигэр улахан тэрээһиннээхтик ыытылынна. Аллыҥа орто оскуолатын педагогтара уонна дириэктэр Уаров Владимир Владимирович илэ бэйэлэрэ төһүү күүс буоланнар, тэрээһин үрдүк таһымнаахтык ааста. Бырагырааманан маҥнай исписэлиистэр 5 хамаандаҕа арахсан, бэйэ-бэйэлэрин кытта билсистилэр. Салгыы оскуола спортивнай саалатыгар тэрээһин үөрүүлээх аһыллыыта буолла. Манна Сунтаар улууһун үөрэҕириитин салалтатын начаалынньыга Альберт Ионович Иванов кэлэн кыттыыны ылла, сүдү суолталаах уонна кэрэхсэбиллээх тыл эттэ. Ону тэҥэ Аллыҥа орто оскуолатын диэриэктэрэ Уаров Владимир Владимирович, улуус үөрэҕириитин салалтатын исписэлииһэ уонна «СунАМП» иккис тыынын тэрийсээччитэ Трофим Алексеевич Иванов үөрүүлээх күн үүмүтүнэн эҕэрдэлээтилэр. Ассоциация маҥнайгы састаабын чилиэттэрэ Надежда Владимировна Тихонова уонна Клавдия Иннокеньевна Алексеева урукку сылларын ахтан, саҕалаабыт хамсааһыннарын саҥалыы сайыннарбыттарыттан үөрэн туран, эдэрдэргэ бэйэлэрин өр сыллаах үөрүйэхтэрин үллэһиннилэр уонна “CунАМП” гимнын ыллаан слетка кэлбиттэри үөрэр-көтөр санаалаатылар. Ол бириэмэҕэ улуус уонна түмсүү былааҕын өрө тартылар. «Саамай дьоллоох күнүм үүннэ диэхпин баҕарабын, тоҕо диэтэр учуутал буолбут үлэм түмүгүн көрдүм диэххэ сөп. Төрүттээбит хамсааһыммыт салҕыы сайдыбата диэммин санаарҕыыр этим испэр. Онтон бу саҥа үлэлии кэлбит оҕолорбут, үөрэнээччилэрбит, биһиги иитэн таһаарбыт ыччаттарбыт номнуо учуутал буолан, эргиллэн кэлэннэр биһиги үлэбитин сөргүттүлэр. Наһаа үчүгэй үрдүк таһымнаах слет буолла диэн сыаналыам этэ уонна тэрийбит ыччаттарга, эдэр коллегаларбар үрдүктэн үрдүк ситиһиилэри баҕарабын. Педагог идэтэ наһаа үчүгэй, саамай үтүө, айымньылаах уонна махтаныылаах дии саныыбын. Ис-истэриттэн өйдөөн туран, эппиэтинэстээхтик «СунАМП” үлэтин сөргүтэ бары кыттыһан үлэлииргитигэр баҕарабын» – диэн Надежда Тихонова санаатын үллэстэр.

Аллыҥа орто оскуолатыгар педагогтары бииргэ түмэр уонна интэриэһи бөҕөргөтөр араас трениҥнэр уонна станцияларынан күрэстэр ыытылыннылар. Салгыы слет кыттыылаахтарыгар «Успех каждого ребенка» диэн флешмоб, «Интеграция в УДО», «Грантовая политика в ОУ, УДО, ДОУ», «Гаджеты – польза или вред» уонна «Молодые руководители в ОУ, УДО, ДОУ» диэн тиэмэлэринэн хамаандаларга төгүрүк остуол ыытылынна. Манна педагогтар бэйэлэрин толкуйдарын, санааларын үллэһиннилэр, бэриллибит бириэмэ иһигэр бырайыактары бэлэмнээн көмүскээтилэр. Маны даҕатан эттэххэ, олус туһалаах, кырдьык араас тирээн турар проблемалары таарыйбыттар, ону быһаарар бырайыактары толкуйдаабыттар. «Веселые старты» курэхтэһии саха норуотун спортивнай оонньууларын көрүҥүнэн ыытылынна.

Аллыҥа сэлиэнньэтин кулуубугар слет маҥнайгы күнүн түмүктүүр кэнсиэр буолла. Эдэр исписэлиистэр оскуолаларынан уонна тэриллибит хамаанданнан мусукаалынай нүөмэрдэри туруордулар. Педагогтар кырдьык элбэх талааннаахтарын дакаастаатылар: дууһаны долгутар ырыалар ылланнылар, араас үҥкүү  уонна сыанка көрдөрдүлэр, сахалыы тыыннаах хоһоон аахтылар. Салгыы слет кыттыылаахтара Тойбохой сэлиэнньэтигэр айаннаатылар. Г.Н. Бессонов аатынан Тойбохойдооҕу историческай-кыраайы үөрэтэр комплекска «Түмэлгэ түмсүү» диэн билиини хаҥатар уонна бөҕөргөтөр квест-оонньуу тэрилиннэ. Ону тэҥэ кыттааччылар мусуой үлэһиттэрин кытта сирэй көрсөн олорон кэрэхсэтэр уонна туһалаах кэпсэтиини ыыттылар.

Слет иккис күнүгэр, Тойбохой нэһилиэгин кулуубугар Сунтаар улууһун аҕа баһылыгын Григорьев Анатолий Васильевичтыын көрсүүһүү буолла. Улуус үөрэҕириитин салалтатын началынньыга Иванов Альберт Ионович, Аллыҥа орто оскуолатын дириэктэрэ Уаров Владимир Владимирович, Тойбохой орто оскуолатын дириэктэрэ Васильев Борис Николаевич кэпсэтиигэ кыттыстылар. Эдэр исписэлиистэр үлэ өттүтүгэр туох кыһалҕалаахтарын иһитиннэрдилэр уонна тирээн турар ыйытыктарын биэрдилэр. Ону тэҥэ улуус үөрэҕириитин сайыннарарга туох наадалааҕын, хайдах систиэмэ көдьүүстээх буолуон сөбүн кэпсэттилэр. Санааларын уонна бырайыактарын иһитиннэрдилэр.

Быйылгы эдэр педагогтар слеттарын өрөгөйдөөх сабыллыытыгар, хамаандаларга анал бириистэри, хас биирдии кыттааччыга сертификат уонна көхтөөхтөргө анал номинациялары туттардылар.

Кыттааччылар уонна тэрийээччилэр бары киэҥ өйдөөх-санаалаах, талба талааннаах, барытыгар көхтөөх, наһаа аһаҕас уонна олус үчүгэй сырдык ыралаах ыччаттар эбит. Онон хас биирдиилэригэр тэтимнэрин ыһыктыбакка салгыы сайдан, үүнэн, үтүө мааны үрдүк ааттаах учуутал буолан тахсалларыгар баҕарабыт.

“СунАМП” актива олус үчүгэй, биһирэтиилээх тэрээһини ыыппыт. Айымньылаах, мындыр өйдөөх, үөрэҕирии араас эйгэтин  эдэр исписэлиистэрэ алтыһан, түмсүүнү салайбыттара инникилээх буолуо диэн бигэ эрэллээхпин.

Ааптар: Дьулустаан ЕГОРОВ, Сунтаар улууһун үөрэҕин салалтатын методическай салаатын исписэлииһэ.

Добавить комментарий