Сунтаар улууһун үөрэҕириитин управлениетын(нач.Иванов А.И.) 2019-2020 үөрэх дьылын тэрээһиннэрин былаанынан улуустааҕы оскуола библиотекаларын ортолоругар ааҕыыга бырайыактар күрэхтэрэ үрдүк таһымҥа ыытылынна. Тэрээһин А.П.Павлов аатынан Сунтаар №1 орто оскуолатын библиотекатыгар буолла.
Аныгы кэмҥэ, информационнай технология түргэнник сайдан, кинигэни ааҕыы намтаабыта Россия обществотын барытын долгутар сытыы кыһалҕа буолар. Библиотека былыргыттан билиҥҥи үйэҕэ дылы билиини, сырдыгы тарҕатар үтүө соруктаах. Дьон аахпат буоллахтарына, сатаан толкуйдаабат буолаллар диэн улуу Дидро суруйбута. Билигин көннөрү ааҕыы эрэ буолбакка, дириҥник ааҕааһын ирдэнэр кэмэ кэллэ. Оскуолаҕа библиотекарь, учуутал, төрөппүт-бары ситимнээхтик оҕолору ааҕыы эйгэтигэр киллэрэллэрэ үтүө түмүктээх буолар.
Улуустааҕы оскуола библиотекаларын ортолоругар ааҕыыга бырайыактар күрэхтэригэр 11 бырайыактар көрүлүннүлэр. Дьүүллүүр сүбэҕэ үлэлээтилэр: Сунтаар улууһун библиотекатын кылаабынай библиотекара Спиридонова Саргылана Федотовна, Сунтаар нэһилиэгин оҕо библиотекатын директора Кривошапкина Дария Алексеевна, Сунтаар улууһун үөрэҕириитин управлениетын специалиьа Павлова Александра Семеновна, А.П.Павлов аатынан Сунтаар №1 орто оскуолатын библиотекатын сэбиэдиссэйэ Сивцева Ирина Николаевна.
Уопсай түмүккэ кыайыылааҕынан «Путешествие в страну Читалия» бырайыагынан Сунтаардааҕы политехническай лицей-интернат библиотекатын сэбиэдиссэйэ Иванова Зинаида Яковлевна буолла. 2 миэстэни -«Читаем всей школой» бырайыагынан А.А.Иванов-Күндэ аатынан Кутана орто оскуолатын педагог-библиотекара Третьякова Изабелла Николаевна уонна «Ааҕыы абылаҥа» бырайыагынан П.Х.Староватов аатынан Элгээйи орто оскуолатын педагог-библиотекара Григорьева Татьяна Николаевна; 3 миэстэни – «Удивительный мир чтения» бырайыагынан А.К.Акимов аатынан Күүкэй орто оскуолатын педагог-библиотекара Саввинова Ксенья Егоровна уонна «Развитие интереса к чтению через творческую реализацию личности» бырайыагынан Сунтаар №3 орто оскуолатын педагог-библиотекара Иванова Августина Нюргуновна ыллылар.
Күрэх түмүгүнэн ааҕыыга аналлаах төгүрүк остуол ыытылынна. Оскуола библиотекаларын үлэтигэр үгүс этиилэр киирдилэр. Бары Сунтаар улууһун оскуолаларын библиотекаларын « Ааҕыы аартыга» диэн уопсай улуустааҕы ааҕыыга бырайыагы торумнаан үлэлэтэргэ сүбэлэстилэр.
Сунтаар улууһун үөрэҕириитин управлениетын информационнай-методическай отдела
