«Тыыннаах классика» диэн ааҕыы библиотечнай марафона Сунтаар улууһун оскуолаларын библиотекаларыгар тэрээһиннээхтик ыытылынна. Библиотечнай марафонна үөрэнээччилэр, учууталлар, төрөппүттэр актыыбынай кыттыыны ыллылар. Тэрээһиннэ саха, нуучча литературатын суруйааччыларын айымньыларын аахтылар. Ааҕыы суолтатын үрдэтэр үлэ аныгы кэмнэ былааннаахтык барара наада. Библиотекарь, учуутал, төрөппүт бары сомоҕолоһон үлэлииллэрэ үтүө түмүктээх буолар. Оскуола библиотекаларыгар кинигэ выставкалара тэрилиннилэр. Кутана оскуолатыгар тэрээһин түмүгэр үөрэнээччилэр биир дойдулаахтарын А.А.Иванов-Күндэ хоһоонун күргүөмнээхтик доргуччу аахтылар. Түбэй орто оскуолатыгар библиотечнай марафон түмүгэр учуутал Гриц Л.В. А.С.Пушкин «Я помню чудное мгновение» хоһоонун, онтон ити хоһоону директоры солбуйааччы Максимова С.А. сахалыы Михалева Н.В.-Сайа тылбааһыгар «Өйдүүбүн ол күлүм түгэни» аахтылар. Күүкэй орто оскуолатыгар алын сүһүөх кылаас оҕолоро А.С.Пушкин остуоруйаларын, Амма Аччыгыйа «Тоҕус төгүл тоҕо?» кэпсээннэрин ааҕаннар инсценировка туруордулар. Маар Күөл орто оскуолатыгар библиотечнай марафон кэмигэр 9-11 кылаас үөрэнээччилэрэ флешмоб тэрийдилэр. Ол курдук, Л.Н.Толстой «Война и мир» сүдү айымньытын нууччалыы, сахалыы аахтылар. Туойдаах, Хадан, Сиэйэ оскуолаларыгар ааҕыыга күрэхтэр ыытылыннылар.Угүс кыттааччылар ордук сөбүлээн А.С.Пушкин, Л.Н.Толстой, И.А.Крылов, М.Ю.Лермонтов, С.А.Есенин, П.А.Ойуунускай, Амма Аччыгыйа, Күндэ, П.Н.Тобуруокап, Л.А.Попов айымньыларын аахтылар. Оскуола директордара Архангельская А.А., Тимофеев М.Ф., Бекренева М.А., Архипов В.Н., Игнатьева С.В., Евсеева Л.Е., Саввинова Т.Г. библиотечнай марафонна кыттаннар үтүө холобуру көрдөрдүлэр.
«Тыыннаах классика» ааҕыы библиотечнай марафона Сунтаар улууһун оскуолаларын библиотекаларыгар үрдүк таһымна ыытылынна. Маннык тэрээһин үтүө үгэс буолан сылын аайы ыытыллар буолуоҕа.
Сунтаар улууһун үөрэҕириитин управлениетын информационнай-методическай отдела
