Саха хомуһугар аналлаах алын кылаас оҕолоругар олимпиада

Ахсынньы 7 күнүгэр Өрөспүүбүлүкэ иһинээҕи хомус Декадатын чэрчитинэн Сунтаар улууһугар аан маҥнай Саха хомуһугар аналлаах алын кылаас оҕолоругар олимпиада ыытылынна.

Бырайыак ааптара, уһуйааччы, хомуһу чинчийээччи, биһиги биир дойдулаахпыт, Сунтаар улууһун култууратыгар кылаатын иһин киллэрбит бэлиэ хаһаайката Антонина Константиновна Никитина.

Хомус нарын-истиҥ иэйиилээх, саха норуотун култууратын, мусукаалынай сатабылын национальнай үгэһин  чуор куолаһа, үгүс үйэлэри нөҥүөлээн кэлбит дьикти инструмен буолар.

Маҥнайгы хомус олимпиадатыгар улуус иһинээҕи үөрэх тэрилтэлэриттэн 46 алын сүһүөх үөрэнээччилэрэ кытыннылар. Кинилэр 4 уруокка сырыттылар: Хомус ууһа көрөөччүлэр иннилэригэр хомуһу оҥорон таһаарда, хомус устуоруйатын туһунан уруок-презентация, өрөспүүбүлүкэтээҕи Хомус түмэлин иһинэн виртуальнай экскурсия уонна хомуска араастык оонньуур ньымалары үөрэтии. Хас уруок кэнниттэн кыттааччылар тест оҥорон төһө болҕомтолоохтук истибиттэрин, билиилэрин тургутан көрдүлэр.

Ол курдук, бастакы миэстэ Сунтаардааҕы алын сүһүөх оскуолатын 3 “ж” кылааһын үөрэнээччитэ Оконешникова Амелия (сал. Новикова Г.В.), иккис – Күндэйэ орто оскуолатын 4 кылааһын үөрэнээччитэ Гуринова Алина (сал. Степанова М.М.), үһүс — Сунтаардааҕы алын сүһүөх оскуолатын 4 “д” кылааһын үөрэнээччитэ Иванова Дарина (сал. Кривошапкина С.Ф.) буоллулар.

Норуоппут национальнай култууратын бэлиэтин киэн тутта илдьэ сылдьарбыт, кэлэр кэскили уһуйарбыт бэрт үчүгэй.

Добавить комментарий