Улуу Кыайыы 75 сылын көрсө үүнэр көлүөнэ дойдутун историятын үөрэтэригэр Сунтаар улууһун Аҕа баьылыга Григорьев А.В. «Наследники Победы» муниципальнай бырайыагы өйөөн бигэ тирэх буолла. Сунтаар улууһун үөрэҕириитин управлениятын начальнига Иванов А.И. бирикээһинэн бары оскуолаларга «Наследники Победы» муниципальнай бырайыак комиссиялара тэрилиннилэр. Бу улахан суолталаах бырайыак ааптара, салайааччыта Сунтаардааҕы Оҕо дьоҕурун сайыннарар киин директора Антонова А.В.
«Наследники Победы» бырайыак түмүгүнэн Аҕа дойду Улуу сэриитигэр кыттыбыт биир дойдулаахтарбыт ааттарын үйэтитии, буойуннар ааттарын,төрөөбүт сирдэрин чуолкайдааһын, история биллибэт страницаларын арыйыы, мобильнай сыһыарыылары оҥоруу, виртуальнай музей историческай түһүмэхтэрин хаҥатыы, үөрэнээччилэргэ Ийэ дойдуларынан киэн туттууну үөскэтии, сэрии историятын үөрэтии, билии буолаллар.
«Наследники Победы» муниципальнай бырайыак үлэтин тула «Белые пятна и невыясненные страницы истории, «знаковые» истории Сунтарского района в годы Великой Отечественной войны» төгүрүк остуол ахсынньы 20 күнүгэр Дьокуускайга «Биир Ньыгыл Россия» партия общественнай палататыгар ыытылынна. Кыттыыны ыллылар Сунтаар улууһун баьылыгын солбуйааччыта Еремеев Г.М., Ил Түмэн депутата Николаев А.Ю., Национальнай архив үлэһиттэрэ Степанова Н.С., Малышева Н.Н., Сивцев В.С. Төгүрүк остуолу салайан ыытта Сунтаардааҕы Оҕо дьоҕурун сайыннарар киин педагог-организатора Лидочен Г.Н. Сунтаар архивын салайааччыта Яковлев А.Е. сиһилии сунтаардар Аҕа дойду Улуу сэриитигэр диэн темаҕа кэпсээтэ уонна көлүөнэ уларыйыытын учуоттуохха наадатын, Кэмпэндээйи библиотекатын сэбиэдиссэйэ, кыраайы үөрэтээччи Местникова Т.И. Кэмпэндээйи колониятын ГУЛАГка тэҥниэххэ диэн тыл эттилэр. Биир дойдулаахтарбыт Национальнай архив үлэьиттэрэ бырайыак үлэтигэр көмө буолуохпут диэтилэр. Ил Түмэн депутата Николаев А.Ю. «Наследники Победы» муниципальнай бырайыак улахан суолталааҕын тоһоҕолоон бэлиэтээтэ. Андрей Юрьевич Кэмпэндээйи колониятын боппуруоһугар көмөлөһүөм диэн биллэрдэ уонна докумуону киниэхэ түргэнник оҥорон ыыталларыгар сорудахтаата. Төгүрүк остуолга «Наследники Победы» муниципальнай бырайыак тула үгүс этиилэр, санаалар этилиннилэр. Тохсунньу ыйга Сунтаардааҕы Оҕо дьоҕурун сайыннарар киин коллектива(дир.Антонова А.В.) «Наследники Победы» муниципальнай бырайыак чэрчитинэн форум ыытар. Манна бары нэһилиэктэр оскуолаларын педагогтара, үөрэнээччилэрэ кыттыыны ылыахтаахтар.
Сунтаар улууһун үөрэҕириитин управлениятын информационнай-методическай отдела
