“Мин -чинчийээччибин” конкурс

Муус устар 15 күнүгэр “Мин -чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстарын республиканскай таһымын кыайыылаахтарын А.П.Павлов аатынан Сунтаар№1 орто оскуолатын библиотекатын саалатыгар чиэстээһин тэрээһинэ ыытылынна.
Бу конкурс историятын сэгэтэн кэпсиир буоллахха, “Мин- чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстара 2005 сылтан ыытыллар. Дойдубут үгүс регионнарыттан оҕолор кыттыыны ылаллар. Ону таһынан Белоруссияттан, Казахстантан, Украинаттан тиийэ кытталлар. Бу конкурс сүрүн соруга-оҕолору наука үгүс хайысхаларыгар чинчийэр-үөрэтэр үлэҕэ үөрэтии, интэриэһи үөскэтии, дакылааты суруйарга, бэйэ санаатын кэпсииргэ, үөрэппит темаларын ырытарга, ааҕарга, уһуйар сыаллаах буолар.
Сунтаар улууһугар бастакы конкурс 2017 с. ыытыллыбыта. Барыта 80 оҕо кыттыбыта. Республиканскай этапка биэс үөрэнээччи Петров Игорь, Зырянова Мичийээнэ, Павлова Аина, Серов Артур Сунтаардааҕы начальнай оскуолатыттан, Гуринов Мирослав Бордон орто оскуолатыттан лауреат буолбуттара. Бүтүн Россиятааҕы этапка Зырянова Мичийээнэ дипломант буолбута. 2018 сыллаахха улуустааҕы этапка 112 оҕо кыттыбыта. Бүтүн Россиятааҕы этапка Кравцов Виктор, Иванов Дьулустан, Павлова Аина Сунтаар начальнай оскуолатыттан уонна Федоров Радомир Кэмпэндээйи орто оскуолатыттан лауреат, Павлова Аина 3 ст.дипломант аатын ылбыттара. Быйыл “Мин- чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстарын улуустааҕы этабыгар 188 оҕо кыттыыны ылбыта. Республиканскай конкурс кулун тутар 8 күнүттэн 31 күнүгэр дылы буолбута. Манна барыта Саха сирин 29 улуустарыттан 272 оҕолор кытыннылар. Бу республиканскай этапка улууспутуттан 13 оҕо ситиһиилээхтик кытыннылар. Элгээйи орто оскуолатын 2 кыл. үөрэнээччитэ Никитин Никита кыайыылаах буолла. Дипломнарынан наҕараадаланнылар Эверстов Давид, Куокуну орто оскуолатын 4 кыл. үөрэнээччитэ, Гуринова Лилия, Кэмпэндээйи орто оскуолатын 3 кыл үөрэнээччитэ, Яковлева Эвелина, Элгээйи орто оскуолатын 2 кыл. үөрэнээччитэ, Чойнова Злата, Хадан орто оскуолатын 2 кылааһын үөрэнээччитэ, Сиэйэ орто оскуолатыттан 4 кыл. үөрэнээччитэ Андросов Женя ., 2 кыл. үөрэнээччитэ Андросов Валера, Устье орто оскуолатыттан 2 кыл. үөрэнээччитэ Озерецковская Амелия, 1 кыл. үөрэнээччитэ Иванов Сайаан, Сунтаар начальнай оскуолатыттан 1 е кыл. үөрэнээччитэ Никифорова Мария, 1д кыл. үөрэнээччитэ Аммосов Харысхал, 3 в кыл. үөрэнээччитэ Никитина Нарияна.
“Мин- чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстарын улууска салайан ыытар Сунтаар улууһун үөрэҕириитин кылаабынай специалиһа Попова М.И. оҕолору истиҥ тылларынан эҕэрдэлээтэ.
Дьокуускай куораттан конкурска ситиһиилээхтик кыттыбыт оҕолорго бэйэтин эҕэрдэтин Саха Республикатын Малай Академиятын ректора, биир дойдулаахпыт Павлов В.К. онлайн нөҥүө эттэ. Сунтаар улууһун үөрэҕин управлениятын начальнигы солбуйааччыта Васильев Б.Н. конкурс кыайыылаахтарын эҕэрдэлээтэ уонна кубоктары, мэтээллэри, дипломнары туттарда. Сунтаар улууһун үөрэҕин управлениятын специалиһа Павлова А.С. Хоро Харыйалааҕар 1875с. таҥара дьиэтин туттарбыт, 1906 c. Кокуора нэһилиэгин тэрийбит, 1916 с. пансионнаах оскуоланы арыйбыт Кокорин Андрей Петрович сыдьааннарын ааттарыттан анал бирииһи Күндэйэ орто оскуолатын 3 кылааһын үөрэнээччитигэр Саввинова Джулияҕа уонна «Алаһа» улуустааҕы общественнай сурунаалын редактора Игнатьева Л.И. аатыттан редколлегия анал бирииһин Хадан орто оскуолатын 2 кылааһын үөрэнээччитигэр Чойнова Златаҕа туттарда.
Хомус алыптаах тыаһынан музыкальнай эҕэрдэтин тиэртэ Сунтаар начальнай оскуолатын үөрэнээччитэ Амелия Оконешникова. “Мин- чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстарын Бүтүн Россиятааҕы этабын икки төгүллээх лауреата Сунтаардааҕы политехническай лицей 6 кылааһын үөрэнээччитэ Федоров Радомир бэйэтин үлэтин билсиһиннэрдэ уонна оҕолору эҕэрдэлээтэ.
Быйылгы «Мин -чинчийээччибин” диэн Бүтүн Россиятааҕы чинчийэр үлэлэр уонна бырайыактар конкурстарын республиканскай этабын оҕолоро дакылааттарыттан кылгастык билсиһиннэрдилэр, санааларын үллэһиннилэр.
Оҕолор саңаттан-саңаны билиигэ-чийчийиигэ үөрэх чыпчаалын сайдыытын суолугар бигэтик үктэнэннэр, дьоҕурдарын сайыннаран, ситиhиилээхтик үөрэнэн киэң билиилээх, культуралаах, ситиһиилээх, аныгы олох ирдэбилигэр эппиэттэhэр үөрэхтээх дьон буола улаатыҥ диэн алгыспытын аныыбыт.

Сунтаар улууһун үөрэҕириитин управлениятн информационнай-методическай отдела

Добавить комментарий