Бастыҥ директор

С.Н.Донской –II аатынан Педагогтар идэлэрин таһымнарын үрдэтэр институт тэрийиитинэн аан бастаан республикаҕа “Бастыҥ директор-2021” конкурс ыытылынна. Конкурс сыала-соруга: оскуола салайааччыларын профессиональнай таһымнарын сайыннарыыга, үрдэтиигэ; үөрэх тэрилтэтигэр үтүө түмүктэрдээх уонна инновационнай менеджмент опыттарын тарҕатыы буолар. Уопсайа араас улуустартан 8 директордар кытыннылар. Сунтаар улууһуттан эдэр эрчимнээх, кэскиллээх салайааччы- Аллаҥа орто оскуолатын директора Уаров Владимир Владимирович ситтиһиилээхтик кытынна. Конкурс 3 түһүмэҕинэн ыытылынна. Владимир Владимирович “Формула успеха” (видеоролик 3 мүн.) түһүмэххэ туһааннаах темаҕа 10 мүнүүтэҕэ үлэтин туһунан кэпсээтэ; “Стратегическое решение” түһүмэххэ кейс материалларынан салайыы бырайыагын торумнаан оҥорон педсовет тэрийэн ыытта, экспертар сытыы боппуруостарыгар эрэллээхтик эппиэттээтэ; «Дебат» түһүмэҕэр аныгы үөрэҕирии сайдыытын тула ырытыы, кэпсэтии буоллулар. Конкурс түмүгүнэн Уаров В.В. “Патриотическое воспитание” номинация кыайыылааҕа буолла уонна Саха Республикатын үөрэҕириитин туйгуна бэлиэнэн наҕараадаланна. «Саха сирин кэнчээри ыччата» республикатааҕы тирэх киин Аллаҥа орто оскуолатын үөрэнээччилэригэр «Сир уустара» оҕо лааҕырыгар путевкалары анаата.
Владимир Владимировиһы республиканскай конкурска үрдүк ситиһиигитинэн эҕэрдэлиибит уонна салайар, үөрэтэр-иитэр үлэҕитигэр баҕарабыт айымньылаах, таһаарыылаах үлэни!

Сунтаар улууһун үөрэҕин управлениетын информационнай-методическай отдела

Добавить комментарий