Үөрэҕириигэ ситиһии
«Иитээччи» диэн тыл истиҥник — сылаастык иһиллэр. Иитээччи үрдүк анала – кыра оҕону личность быһыытынан сайыннарыыта, киниэхэ кэрэни, үтүөнү,сырдыгы иҥэрэн билии аартыгар киллэриитэ буолар. Оскуолаҕа киириэн иннинээҕи сааһыгар оҕо этэ-сиинэ, өйө-санаата, уйулҕата үлүскэннээхтик сайдар, инники олоҕор туһанар, киһи быһыытынан хаачыстыбата, майгыта-сигилитэ, сатабыллара, дьоҕурдара үөскүүллэр.
Балаҕан ыйын 27 күнэ-Иитээччи уонна оҕо уһуйаанын бары үлэһиттэрин бырааһынныгар үөрүүлээх сонун кэллэ. Ол курдук, «Бастыҥ тыа сирин оҕо уһуйаана-2021» республиканскай кэтэхтэн конкурс кыайыылааҕынан Сунтаар нэһилиэгин «Сардаана» оҕо сайдар киинэ (сэбиэдиссэй Жиркова Марина Геннадьевна) буолла.
Бу үөрүүлээх күн, идэлээх бырааһынньыккытынан Марина Геннадьевнаны уонна «Сардаана» оҕо сайдар киинин үлэһиттэрин кыайыыгытынан эҕэрдэлиибит уонна Эһиги сыралаах, түбүктээх үлэҕит иһин дириҥ махтал тылларын этэн туран, үүнэр көлүөнэни иитэр-үөрэтэр үлэҕитигэр ситиһиилэри, айымньылаах саҕахтары, тус бэйэҕитигэр кытаанах доруобуйаны, дьолу, этэҥҥэ буолууну баҕарабыт!
