Эһигини Сунтаар улууһун үөрэҕириитин салалтатын аатыттан ис сүрэхпиттэн идэлээх бырааһынньыккытынан – Учуутал күнүнэн итиитик- истиҥник эҕэрдэлиибин!
Биһиги киэн туттабыт олохторун учуутал идэтигэр анаабыт ветеран педагогтарбытынан. Кинилэр бэриниилээх таһаарыылаах үлэлэрэ биһиэхэ, барыбытыгар, үтүө холобур буолар. Ытыктыыр аҕа көлүөнэ педагогтарбытыгар, сүгүрүйэн туран, барҕа махтал тылларын тиэрдэбин.
Сунтаар улууһугар быйылгы үөрэх дьылыгар 21 эдэр специалистар үөрэхтэрин бүтэрэннэр педагогическай үлэлэрин саҕалаатылар. Улууспутугар билиини, сырдыгы, үтүөнү тарҕатааччылар – учууталлар көлүөнэлэрин ситимэ быстыбакка салҕанар.
Үөрэҕирии-норуот сайдыытын тирэҕэ. «Үөрэҕирии” национальнай бырайыак чэрчитинэн улууска үгүс үлэ ыытыллар. Оскуолаларга үүнэр көлүөнэни үөрэтиигэ-иитиигэ табыгастаах усулуобуйалар тэриллэн үлэлииллэр. Оскуолаҕа учууталлар хас биирдии үөрэнээччи чэгиэн доруобуйалаах, дьоҕурун, сатабылын сайыннаран, ситиһиилээхтик үөрэнэн дириҥ билиилээх, киэҥ көрүүлээх, дьоһуннаах гражданнар буолалларын туһугар тустаах сыал-сорук туруорунан үүнэр көлүөнэни үөрэтэллэр-иитэллэр. Бу сыалы-соругу толорууга оскуола, төрөппүттэр уонна общественность бары бииргэ сомоҕолоһон таһаарыылаахтык үлэлииллэр. Учуутал оҕону билии киэҥ ыллыгар киллэрэр, үөрэх сырдыгар угуйар, кэрэҕэ уһуйар. Учуутал биэрбит үөрэҕэ билии-сайдыы төрүтэ буолан кэнчээри ыччаты үтүө кэскиллээх суолга сирдиир.
Күндү учууталлар!
Эһиги сыралаах, түбүктээх үлэҕит иһин дириҥ махтал тылларын этэн туран, үүнэр көлүөнэни үөрэтэр-иитэр кэскиллээх үлэҕитигэр айымньылаах саҕахтары, ситиһиилэри, тус олоххутугар кытаанах доруобуйаны, дьолу, быйаҥнаах олоҕу, этэҥҥэ буолууну баҕарабын.
Сунтаар улууһун үөрэҕириитин салалтатын начальнига А.И.Иванов
