Күүкэй оскуолатыгар Олоҥхо декадата сэргэхтик тэрилиннэ

2005 сыллаахха ЮНЕСКО олоҥхобутун аан дойду култууратын биир чаҕылхай шедевринэн биллэриэҕиттэн, улууспут үөрэҕин тэрилтэлэригэр олоҥхону чинчийии, толорорго үөрэтии саҕаламмыта, олоҥхо педагогикатыгар болҕомто ууруллубута. Күүкэйкэ сайын ахсын Тимофеев Никандр Прокопьевич, Николаева Мария Васильевна уһуйааччылардаах өрөспүүбүлүкэ таһымнаах оҕолору олоҥхоҕо уһуйар лааҕыр таһаарыылаахтык үлэлээбитэ. Бу оскуолаларга олоҥхону толорорго, чинчийэргэ үөрэммит оҕолор хайы-үйэ култуура, үөрэхтээһин, наука уо.д.а. эйгэлэргэ айымньылаахтык уонна ситиһиилээхтик үлэлии сылдьаллара кэрэхсэбиллээх.

       Күүкэй оскуолатыгар сыл ахсын Олоҥхо  декадата ыытыллар, оттон быйылгы декада филология наукатын дуоктара, профессор, фольклорист Илларионов Василий Васильевич төрөөбүтэ  75 сааһыгар ананан ыытылынна.

       Тэрээһин Илларионов В.В. бииргэ төрөөбүт балта, Саха Өрөспүүбүлүкэтин  үөрэҕириитин туйгуна, учууталлар учууталлара М.В.Николаева  Афанасий Попов-Муотаан «Бэриэт  Бэргэн» олоҥхотуттан быһа тардыыны толорорун истииттэн саҕаланна. Кылаас чаастара, Олоҥхо дьыктаана, «Мин олоҥхону уруһуйдуубун» күрэх, «Олоҥхо алыптаах суолунан» викторина, олоҥхо сүрүн геройдарын куукула гынан оноруу, хомуур олоҥхо көхтөөтүк бардылар. Декада устата тиэмэлэринэн кылаас чаастарыгар, ол курдук «Олонхо алыптаах дойдута», «Саха эпоһа – олоҥхо», «Төрөөбүт тыл кэрэтэ олоҥхо- өбүгэбит үгэһэ», «Олонхо эйгэтэ», «Олонхо – саха норуотун баайа» уо.д.а.  киэҥ ис хоһоонноох билиһиннэрии барда.

       Олоҥхо дьыктааныгар 1-кы кылаастан ураты бары үөрэнээччилэр уонна улахан дьон С.Васильев «Мөҥүрүүр Бөҕө», В.Каратаев «Оҕо Тулаайах» олоҥхолоруттан быһа тардыылары суруйдулар. Алын кылаастарга бастыҥ дьыктаан суруйааччылара Саввинова Алима, Кривошапкина Чэмэлиинэ, Алексеева Лилиана; орто сүһүөххэ Трофимова Нарыйа (7 кыл.), Прокопьева Дарина (8), Кириллина Сабия (7); улахан сүһүөххэ Черкашин Артем (10), Александрова Сахалина (9), Егорова Анжелика(10); улахан дьонно Герасимова И.М., Спиридонова В.А., Алексеева М.А. буоллулар. «Олоҥхо алыптаах суолунан» диэн викторина куйаар ситимин нөҥүө  ыытылынна,  3 оҕо 100% сепке эппиэттээтэ, кыттааччылар бары электроннай сертификат ыллылар.

Олоҥхо сюжеттарынан оҕолор дьүһүйэн ойуулаабыт үлэлэрэ анал стендэҕэ көрүүгэ туран, болҕомтону тартылар. Оскуола библиотекара Саввинова К.Е. декада устата «Олоҥхо эйгэтин сэгэтэн» диэн биир дойдулаахпыт, олоҥхону чинчийээччи Илларионов В.В. сахабыт норуотун тылын, историятын, олоҕун, үгэстэрин үйэтиппит араас олоҥхолоох кинигэлэрин быыстапкатын туруорда.

Декада биир сонун тэрээһининэн олоҥхо сүрун геройдарын куукула гынан оноруу буолла. Кылаастарынан биирдии геройу онорорго сорудах бэриллибитин, бары олус үчүгэйдик оҥорон туттардылар. Учууталлар эмиэ үлэлэстилэр. Куукулалар В.В.Илларионов аатынан Оҕо сайдар киинигэр туруохтара, олоҥхо туһунан өйдөбүлү дириҥэтиэхтэрэ.

Олонхо декадатын биир сүрүн тэрээһин — хомуур олоҥхо буолла. Кэм ирдэбилинэн, хас биирдии кыттааччы тус-туһунан видеоҕа толорбута таҥыллан, холбонон, биир  ютуб ханаалга дьон көрүүтүгэр таҕыста. Быйылгы хомуур олоҥхоҕо Сергей Васильев «Мөҥүрүүр Бөҕө» айымньытыгар 92 киһи кытынна.

Декада устата алын кылаас оҕолоругар «Олоҥхо дойдутун устун айан» остуол оонньуута, «Дьулуруйар Ньургун Боотур» сахалыы мультфильм көрдөрүүтэ,улахан кылаастарга «Олоҥхону төһө билэҕин?» оонньуу, Илларионов В.В. туһунан НВК-ҕа, ютубка тахсар биэриилэри көрдөрүү элбэҕи биэрдэ, биллэрдэ.

Тэрээһиннэр түмүктэринэн бастыҥнар Добун суруктары, көхтөөхтүк кыттыбыт кылаастар тэрийээччилэр ааттарыттан Махтал суруктары туттулар. Николаевтар дьиэ кэргэттэрэ  алын кылаас оҕолоругар «Олоҥхо хонуута» диэн остуол оонньуутун онорон бэлэхтээтилэр. Чулууттан чулуулар Илларионов Василий Васильевич анал бирииһин туттулар. Бу тэрээһини төрүт култуура учуутала Федорова Олимпиада  Андреевна, оскуола библиотекара Саввинова Ксения Егоровна иилээн-саҕалаан ыыттылар.

                                                           Жиркова Т.Т.

Добавить комментарий