Саха Республикатын үөрэҕириитин эйгэтигэр 2022 сыл -Ааҕыы сылынан биллэрилиннэ. Олоҥхо дойдута Сунтаар улууһун үөрэҕин тэрилтэлэригэр Ааҕыы сылын чэрчитинэн Л.А.Попов аатынан Арыылаах орто оскуолатын коллективын көҕүлээһининэн «Ааҕыы түhүлгэтин чорооно» айан (эстафета) ыытыллар. Тэрээһин киэн туттар биир дойдулаахпыт Л.А.Попов музейыттан саҕаланна. Леонид Андреевичка 1983 сыллаахха Сиэйэ нэһилиэгин олохтоохторо бэлэхтээбит чороонноро улуус устун бары нэһилиэктэринэн айанын олунньу 21 күнүгэр саҕалаата. Ол курдук, Леонид Андреевич төрөөбүт Арыылааҕыттан Маар Күөлгэ чороон үөрүүлээх быһыыга-майгыга туттарылынна. Тэрээһиҥҥэ тыл эттилэр Арыылаах нэhилиэгин баһылыга Игнатьев И.Н., Маар Күөл баhылыгын солбуйааччыта Кириллин С.Н., Сунтаар улууһун үөрэҕириитин управлениетын специалиһа Павлова А.С., Арыылаах орто оскуолатын директора Никитина Л.Г., Маар Күөл орто оскуолатын директора Тотонова Л.С.
Бу «Ааҕыы түhүлгэтин чорооно» айан сыала-соруктара: ааҕыыны сайыннарыы, ааҕар киһини-иитии, ааҕыыга көҕүлээһин; поэзияҕа, прозаҕа киэн туттар биир дойдулаахтарбыт айымньыларыгар интэриэһи үөскэтии; биир дойдулаахтарбыт айымньыларын үүнэр ыччакка тарҕатыы, оҕо өйүгэр — санаатыгар иҥэрии, ытыктабылы иитии, кинилэр ааттарыгар сүгүрүйүү, киэн туттуу; ийэ тылга, уус-уран литэрэтиирэҕэ тапталы иҥэрии. Ааҕыы түhүлгэтин чорооно ахсынньы 26 күнүгэр Арыылаах нэhилиэгэр улуус устун айана түмүктэнэн эргийэн кэлиэхтээх.
Информационнай-методическай отдел
