Ааспыты ахтыбат киһи силиһэ
быстыбыт үүнээйи кэриэтэ.
Софрон Данилов
Төрөөбүт тылга омук майгыта-сигилитэ, сиэрэ-туома, үгэһэ, төрүт култуурата барыта сөҥөн сылдьар. Онон ханнык баҕарар тыл уонна култуура тыыннаах хаалар, салгыы сайдар кэскилэ, омук сир сирэйиттэн симэлийбэт суос соҕотох мэктиэтэ – оҕону кыратыттан төрөөбүт тылынан иитии-үөрэтии буолар.
Олунньу 9 күнүгэр А.П. Павлов аатынан Сунтаар 1 №-дээх орто оскуолатын саха тылын методикатын холбоһугун учууталлара төрөөбүт тыл уонна сурук-бичик күнүгэр аналлаах дэкээдэ чэрчитинэн улуус таһымнаах саха тылын, литературатын уонна төрүт култуура биридимиэттэригэр метапредметнэй олимпиаданы тэрийэн ыыттылар.
Олимпиада төрөөбүт тылбыт, литэрэтиирэбит, төрүт култуурабыт норуот үйэлэргэ муспут барҕа баайа буоларын өйдөтөр, саха омук историятын, литэрэтиирэтин, култууратын тустарынан биир кэлим билиини хаҥатар, төрөөбүт тылынан киэн туттууга, дуоһуйууга, тылга тапталы иитиигэ туһуланар сыаллаах-соруктаах тэрилиннэ.
Быйылгы олимпиада уратыта – аныгы технологияны туһанан ыраахтан уунан (дистанционно) ыытылынна. Сэттис, ахсыс, онус кылаастартан барыта 210 үөрэнээччи төрөөбүт тылларын, литератураны, төрүт култуураны билиилэрин тургуттулар.
Бу олимпиада, үгэскэ кубулуйан, сыл аайы ыытыллара былааннанар.
Олимпиада түмүгүнэн бастыҥнар дипломунан бэлиэтэннилэр. Кыттыбыт оҕолор олимпиадаҕа кыттыбыттарын туоһулуур сурук туттулар.
