Бүгүн, кулун тутар 14 күнүгэр, өрөспүүбүлүкэҕэ үөрэҕирии миниистирин көҕүлээһининэн анаммыт Ааҕыы сылынан, Л.А.Попов аатынан Арыылаах агрооскуолатын көҕүлээһининэн тэриллибит «Ааҕыы түһүлгэтин чорооно» биһиги нэһилиэкпитигэр кэллэ. «Ааҕыы чороонун», анал график быһыытынан Тойбохой нэһилиэгин баһылыга Иван Александрович Попов салайааччылаах бөлөх аҕалан үөрүүлээх быһыыга-майгыга туттарда. Кинини таһынан бөлөххө Г.Е. Бессонов аатынан Тойбохой орто оскуолатын дириэктэрэ Айаал Валерьевич Тотонов, оскуола педагог библиотекэрэ, саха тылын учууталлара кэлистилэр. Кинилэри Бүлүүчээн сурук аттыгар нэһилиэкпит баһылыга С.К. Барамыгин, лиссиэйбит дириэктэрэ В.И. Данилова, «Чуораанчык» уһуйаан сэбиэдиссэйэ П.Н. Контогорова, «Ситис» интеллектуальнай киин дириэктэрэ М.В. Григорьева салайааччылаах бөлөх көрүстэ. Көрсүү сиэрин-туомун «Бүлүүйээнэ» культура киинин коллектива иилээн-саҕалаан ыыттылар. Ыалдьыттары арыылаах алаадьынан, уохтаах кымыһынан айах туттулар, «Анал» үҥкүү ансаамбыл оҕолоро үҥкүүлээн көрдөрдүлэр.
Көрсүү сиэрин-туомун кэнниттэн лиссиэй рекреациятыгар оҕолорго аналлаах «Ааҕыы чороонун» көрсүү линейката буолла. Тойбохой оскуолатын бибилиотекэрэ, нэһилиэкпит баһылыга, лиссиэйбит дириэктэрэ эҕэрдэ тыл эттилэр. Үөрэх миниистирэ И.П. Любимова Ааҕыы сылынан көҕүлээбит акциятын, элбэх оҕолоох ыалга кинигэ бэлэхтээһин бачыымын салҕаан «Ситис» дириэктэрэ М.В. Григорьева Кириллина В.В. дьиэ кэргэнигэр кинигэ бэлэхтээтэ. Нэдиэлэ устата Ааҕыыга аналлаах ыытыллар тэрээһиннэр быыстарыгар тэрилтэ салайааччылара эмиэ атын элбэх оҕолоох ыалларга бэлэхтиэхтэрэ.
Нэһилиэкпититтэн үүнэн-сайдан тахсыбыт суруйааччылар, суруналыыстар ааттарыттан биир дойдулаахпыт Н.Н. Спиридонов оҕолорго, ыччакка кэс тылын көрдүбүт-иһиттибит. «Чуумпу Бүлүү» роман автора, биир дойдулаахпыт И.А. Иванов суругун ааҕан иһитиннэрдибит.
Түмүккэ, лиссиэй педагогтара Бүлүүчээн туһунан хоһооннортон быһа тардан доргуччу аахтылар. Линейка Бүлүүчээн өрөгөйүн ырыатын бука бары ыллааһынынан түмүктэннэ.
Салгыы «Ааҕыы түһүлгэтин чороонун» буукубалары кытта саҥа билсэ сатыыр биир дойдулаахтарбытыгар, «Чуораанчык» уһуйаан иитиллээччилэригэр илдьэн көрдөрдүбүт, билиһиннэрдибит.
Степанов В.В., лиссиэй учуутала
