Муус устар 4-7 күннэригэр Сунтаар улууһун алын сүһүөх үөрэнээччилэрин икки ардыгар бастакы KidSkills (Умения юных) чемпионат буолан ааста.
Бу чемпионат тэрийээччилэринэн Сунтаар улууһун үөрэҕириитин салаата (начальник Иванов Альберт Ионович), Н.М.Родионова аатынан Сунтаардааҕы оҕо дьоҕурун сайыннарар киин (директор Антонова Ангелина Владимировна), Сунтаардааҕы алын сүһүөх оскуолата (директора Назаров Алексей Семенович) буоллулар.
Кулун тутар ыйтан KidSkills (Умения юных) күрэх бэйэтин хамсааһына саҕаланан Интернет ситимин нөҥүө кытааччыларга анаан араас билсиһиннэрэр, үөрэтэр семинардар буолбуттара. Кылаас салайааччылара, төрөппүттэр, компатриоттар түмсэн бэлэмнэнии үлэтин ыыппыттара.
KidSkills (Умения юных) чемпионат икки площадкаҕа улуус 10 (Тэҥкэ, Кутана, Бүлүүчээн, Тойбохой, Бордоҥ, Сунтаар нэһилиэгин 4 оскуолата уонна биир эбии үөрэхтээһин тэрилтэтэ) оскуолаларыттан 23 кылаас хамаандаларын түмтэ. Түөрт күн устата 101 кыттааччы 38 компатриот-настаабынньык сэттэ араас компетенцияларынан кырачаан дизайнердар, парикмахердар, повардар, журналистар, иистэнньэҥнэр, робототехниктар уонна дебатердар (куолуһуттар) бэйэлэрин дьоҕурдарын көрдөрдүлэр, идэҕэ туһаайыллыбыт сатабылы боруобалаан көрдүлэр. Эдэр профессионаллар үлэлэрин 26 эксперт, ол иһигэр түөрт улуустааҕы, өрөспүүбүлүкэтээҕи WorldSkills (Молодые профессионалы) күрэх эдэр кыттааччылара сыаналаатылар.
Уопсай хамаанданан түмүк:
Улахан группа
1 миэстэ – Сунтаардааҕы 1 №-дээх оскуола 4-с кылааһын коллектива (кыл. сал. Яковлева С.Ю.)
2 миэстэ – Сунтаардааҕы 3 №-дээх оскуола 4-с кылааһын коллектива (кыл. сал. Иванова С.М.)
3 миэстэ – Сунтаардааҕы алын сүһүөх оскуолатын 4 б кылааһын коллектива (кыл. сал. – Яковлева Т.Е.)
Кыра группа
1 миэстэ – Сунтаардааҕы алын сүһүөх оскуолатын 2 д кылааһын коллектива (кыл. сал. – Кривошапкина С.Ф.)
2 миэстэ – Сунтаардааҕы алын сүһүөх оскуолатын 1 б кылааһын коллектива (кыл.сал.– Алексеева А.Т.)
3 миэстэ – Бордоҥ орто оскуолатын 1 кылааһын коллектива (кыл. сал. – Яковлева У.Т.)
Чемпионат көрүҥнэринэн кыайыылаахтара, призердара дипломнарынан, мэтээллэринэн наҕараадаланнылар.
Кыайыылаах кылаастар кубогынан, дипломунан бэлиэтэннилэр уонна муҥутуур кыайыылаах хамаандалар улуустааҕы оҕо хамсааһынын координационнай Сэбиэтин харчынан бирииһин туттулар.
Надежда Потапова
