Сунтаар оройуонун бочуоттаах олохтооҕо, Саха автономиятын саастыылааҕа, 300 тахса сыл стажтаах Даниловтар педагогическай династияларын аҕа баһылыга Иван Николаевич Данилов 100 сааһыгар, А.П.Павлов аатынан Сунтаар №1 орто оскуолата 160 сылыгар, Саха АССР төрүттэммитэ 100 сылыгар «Учуутал Иван Николаевич Данилов» кинигэ бэчээттэнэн таҕыста. Муус устар 22 күнүгэр кинигэ презентацията А.П.Павлов аатынан Сунтаар №1 орто оскуолатыгар үрдүк таһымҥа ыытылынна.
Саха АССР оскуолатын үтүөлээх учуутала И.Н. Данилов үйэ аҥаарыттан ордук кэмҥэ оҕону, ыччаты иитиигэ-үөрэтиигэ сыралаах, айымньылаах үлэтин туһунан ахтыылар, хаһыакка суруйуулар түмүллэннэр кинигэҕэ киирдилэр. Кинигэни хомуйан оҥордулар: И.Н.Данилов төрөппүт кыыһа СР үөрэҕириитин үтүөлээх үлэһитэ, РФ уопсай үөрэхтээһинин бочуоттаах үлэһитэ, СР үөрэҕириитин туйгуна, СР үөрэҕириитин методиһа Попова Екатерина Ивановна, сиэннэрэ Мария Олеговна, Туяра Олеговна, бырааттара Валериан Парфеньевич, Борис Парфеньевич Николаевтар.
Иван Николаевич Данилов бэйэтин ураты ньыматынан математика курдук уустук, ыарахан предмеккэ үөрэтэр кылааһын оҕолорун 100 бырыһыан ситиһиннэрэрэ. «Оскуола үрдүнэн хаалыылаах кылааһы оскуола үрдүнэн бастыҥ кылааска кубулутуоҕуҥ» диэн сыал-сорук туруорунан, сыл бүтүүтүгэр үөрэҕи билии 100 бырыһыан буоларын ситиспитэ. Мындыр, ырааҕы өтө көрөр педагог И.Н. Данилов оҕону үөрэтиини уонна үлэнэн иитиини туһалаахтык дьүөрэлэһиннэрбитэ. Кини энтузиаст-учуутал, новатор-учуутал, наставник-учуутал быһыытынан үгүс ахсааннаах үөрэнээччилэрин, биир идэлээхтэрин, оройуон уонна республика үөрэхтээһиҥҥэ ситимин салалтатын ытыктабылларын ылбыта. Данилов Иван Николаевич 1958 сыллаахха, 36 сааһыгар, норуот үөрэҕириитин үлэтигэр уһулуччу үтүөлэрин иһин Саха АССР оскуолаларын үтүөлээх учууталын үрдүк аатын ылбыта. Учууталлар Бүтүн Сойуустааҕы съезтэригэр делегатынан талыллан кыттыыны ылбыта, үгүс республика уонна дойду таһымнаах мунньахтарга ыҥырыллан сылдьыбыта, оскуолаҕа математика уруогун биэриигэ бэйэтин уопутун кэпсээбитэ, тарҕаппыта. И.Н. Данилов-учууталлар учууталлара. Иван Николаевич үөрэппит үгүс көлүөнэ оҕолоруттан элбэх учуутал тахсан оройуон уонна республика араас оскуолаларыгар учууталларын дьыалатын салҕаан, оҕону үөрэтиигэ-иитиигэ айымньылаахтык үлэлээбиттэрэ, үлэлии даҕаны сылдьаллар.
Кинигэ презентациятыгар тыл эттилэр Сунтаар улууһун баһылыгын солбуйааччыта Г.М.Еремеев, Сунтаар улууһун үөрэҕириитин салалтатын начальнигар А.И.Иванов, Сунтаар улууһун ветераннарын Сэбиэтин председателэ А.К.Васильев, СР үөрэҕириитин систематын бочуоттаах ветерана, А.П.Павлов аатынан Сунтаар №1 орто оскуолатын директора А.С.Матвеев, РСФСР норуотун үөрэҕириитин туйгуна Н.В.Лидочен, Сунтаар политехническай лицейин директора, РФ уонна СР үтүөлээх учуутала, СР народнай учуутала, Сунтаар улууһун Бочуоттаах олохтооҕо О.К.Сосин, СР үөрэҕириитин утүөлээх улэһитэ, Россия уопсай үөрэхтээһинин бочуоттаах үлэһитэ, В.Г.Павлов аатынан Сунтаар алын сүһүөх оскуолатын директорын солбуйааччыта Е.Н.Алексеева, Россия журналистарын Союһун чилиэнэ, «Гражданскай килбиэн» бэлиэ хаһаайына Г.Е.Филиппова, СР үтүөлээх учуутала, СР үөрэҕириитин туйгуна, СР «Учууталлар учууталлара» бэлиэ кавалера, «1 степеннээх Педагогическай Слава» мэтээл кавалера, Россия уопсай үөрэхтээһинин бочуоттаах үлэһитэ, РФ Президенин Гранын кыайыылааҕа, Сунтаардааҕы гимназия директора Л.Е.Евсеева, И.Н.Данилов үөрэнээччитэ, Россия эргиэнин туйгуна, үлэ бэтэрээнэ И.Н.Сивцева, Иванов В.С., Сунтаардааҕы технологическай колледж директора Г.Н. Михайлов.
Попова Е.И. кинигэҕэ ахтыы биэрбит Иван Николаевич коллегаларыгар, үөрэнээччилэригэр истиҥ махтал тылларын тиэртэ уонна кинигэлэри бэлэхтээтэ.
Сунтаар улууһун үөрэҕириитин салалтатын пресс-сулууспата
