Ыам ыйын 19 күнүгэр Сунтаар улууһун оскуолаларыгар Пионерия 100 сыллаах юбилейыгар аналлаах тэрээһиннэр ыытылыннылар. Түбэй-Дьаархан орто оскуолатыгар торжественнай пионерскай сбор буолла. Урукку сыллар пионердара-выпускниктар пионерскай сбор хайдах ыытылларын көрдөрдүлэр. 5 кылаастан 3 оҕону пионерга ыллылар. Л.Габышев Сима Сергеев туһунан пьесатынан үөрэнээччилэр спектакль туруордулар. Күүкэй орто оскуолатыгар Пионерия күнүгэр элбэх тэрээһин ыытылынна. Ол чэрчитинэн оҕолор Пионерия юбилейынан ветеран учууталларын П.Ф.Александрову, М.В.Николаеваны эҕэрдэлээтилэр. Кириэстээх орто оскуолатыгар Пионерияҕа аналлаах библиотечнай уруоктар, литературнай викториналар ыытылыннылар.
Түбэй орто оскуолатыгар Пионерскай тэрилтэ тэриллибитэ 100 сылыгар аналлаах торжественнай линейка, пионер — баһаатайдары кытта керсуһуу ыытылынна. Пионерга ылыы түгэннэриттэн көрдөрүү, этэрээттэринэн речевкалаах сборга киирии, Знамя, горн, барабан доҕуһуоллаах пионер кэккэтигэр үүммүт учууталлар, ыалдьыттар оҕо саастарын санаан гимн ыллаан хаамыстылар.
Сунтаар улууһун үөрэҕириитин пресс-сулууспата
