Бу соторутааҕыта Сунтаартан Приморскай кыраай «Жемчужина» диэн ааттаах оҕо доруобуйатын көннөрөр лааҕырга 9 оҕо сылдьан астынан кэллилэр.
Оҕолор Приморскай кыраай култууратын, норуот устуоруйатын билистилэр-көрдүлэр. Ону таһынан Японскай муоран флоратын уонна фаунатын үөрэттилэр. Владивосток куоратынан экскурсиялаатылар, Приморскайга океанарумна
уонна сафари пааркаҕа күүлэйдээн дэлби астыммыттар.
Лааҕыр территориятыгар футболлуур, тиэнньиистиир, волейболлуур былаһааккалар баалларыгар оҕолор дуоһуйа оонньообуттар. Эбии интэриэһинэй куруһуоктар үлэлээбиттэр. Холобур, араас куоҥкурустарга, биктэриинэлэргэ, спортивнай күрэхтэһиилэргэ көхтөөхтүк кыттан, билиилэрин хаҥаттан, эт-сиин өттүнэн эрчимирэн кэлбиттэр. Бу туһунан улуустааҕы үөрэҕирии управлениетын иитии уонна эбии үөрэхтээһин сүрүннүүр исписэлииһэ
Сааскылаана Семенова иһитиннэрдэ.
Людмила Семёноваттан бу лааҕырга оҕото баран сынньанан кэллэ. Мин киниттэн аҕыйах ыйытыыбар хоруйдууругар көрдөстүм:
— Уолуҥ Приморскай кыраай лааҕырыгар сылдьан кэллэ дии?
— Оннук. Оҕом Попов Айтал диэн Сунтаартан сылдьар, Дьокуускайтан атын сиргэ ыраата илик. Саҥа ыраах сөмөлүөтунэн көтөн баран кэллэ, наһаа үчүгэйдик сылдьан, элбэх доҕоттордонон кэлбит.
— Төһө элбэх билиини ылан кэллэ? Атын сиргэ баран дэлби астыммыта буолуо.
— Күн аайы араас тэрээһин, муораҕа сөтүөлээн, океанариумна сылдьан араас балыктары, дельфиннары көрөн астыммыт аҕай.
— Аһылыктарын хайдах диирий? Доруобуйаны көннөрүү лааҕыра буолан барыта үчүгэй битэминнээх астар буолуо.
— Астара үчүгэй, күҥнэ 5-тэ аһаталлар диэбитэ.
— Өссө да барыан баҕарара буолуо дии?
— Баран диир, баһаатайдарын олус сөбүлээбит этэ, эдьиийдэрим диэн ааттаан кэлбитэ, элбэх табаарыстаммытыттан астыммыт.
