Бүгүн, балаҕан ыйын 14 күнүгэр, П.Х.Староватов аатынан Элгээйи орто оскуолатыгар ООО «ЯЭСК» тэрилтэни кытта инвестиционнай проект чэрчитинэн оҥоһуллубут искусственнай газоннаах спортивнай площадка аһыллыытын үөрүүлээх тэрээһинэ буолан ааста.
Үөрүүлээх быһыыга-майгыга ООО «ЯЭСК» генеральнай директора Иванов Алексей Валерьевич, Сунтаар улууһун үөрэҕириитин начальнигын солбуйааччы Васильев Борис Николаевич, Элгээйи нэһилиэгин баһылыгынан үлэлээбит, инвестиционнай проегы олоххо киллэрсибит Яковлев Гаврил Леонидович, Элгээйи нэһилиэгин баһылыгын солбуйааччы Иванов Афанасий Егорович кыттыыны ыллылар. ООО «ЯЭСК» үтүө санааланыы акциятын чэрчитинэн Элгээйи орто оскуолатын спортивнай кулуубугар 15 комплект анал бэлиэлээх спортивнай форманы, футбольнай мээчиги, ворота сеткатын бэлэх уунна.
Салҕыы оҕолорго «Кубок ЯЭСК» диэн футболга күрэхтэһии ыытылынна. Күрэхтэһиигэ Элгээйи, Күндэйэ оскуолаларын, Сунтаар гимназиятын хамаандалара күөн көрүстүлэр. Күрэхтэһии түмүгүнэн 1 миэстэни Күндэйэ, 2 миэстэни Элгээйи, 3 миэстэни Сунтаар хамаандалара ыллылар. Кыайыылаахтарга уонна анал номинациялар хаһаайыттарыгар ООО «ЯЭСК» туруорбут кубога, мэдээллэрэ, анал бириистэрэ туттарылыннылар.
Бу курдук үтүө түмүктээх үлэ-хамнас салгыы ыытылла турдун диэн баҕа санаабытын этэбит, бииргэ үлэлэспит ООО «ЯЭСК» тэрилтэбитигэр махталбытын биллэрэбит!
П.Х. Староватов аатынан Элгээйи орто оскуолатын коллектива
