Алтынньы ый 19-21 күннэригэр «Амарах сүрэхтэр» диэн улуустааҕы волонтерскай ааксыйа үрдүк тэрээһиннээхтик ыытылынна. Ааксыйа сүрүн сыалынан – соругунан доруобуйаларынан хааччахтаах, аҕам саастаах, соҕотох ийэлэргэ, тыыл уонна үлэ бэтэрээннэригэр, бэтэрээн учууталларга дьиэ ис-тас үлэлэригэр көмөлөһүү буолар. Ааксыйаҕа П.Х.Староватов аатынан Элгээйи (дир.Игнатьева С.В.), Маар Күөл(дир.Тотонова Л.С.), Куокуну (дир.Тараяров Е.Б.), А.А.Иванов-Күндэ аатынан Кутана(дир. Архипов В.Н.), Л.А.Попов аатынан Арыылаах(дир.Никитина Л.Г.), Г.Е.Бессонов аатынан Тойбохой(дир.Тотонов А.В.), М.Н.Анисимов аатынан Сиэйэ(дир.Чыбыков Ф.Е.), Бордон (дир.Максимов М.А.) оскуолаларын, Сунтаар политехническай лицей-интернатын(дир.Сосин О.К.) барыта 131 үөрэнээччилэрэ көхтөөхтүк кытыннылар.
Ааксыйаны иилээн-саҕалаан РОО «Э-ХОС» некоммерчэскэй тэрилтэ, Сунтаар улууһун үөрэҕириитин иитиигэ уонна эбии үөрэхтээһиҥҥэ отдела тэрийэн ыыттылар. Быйылгы «Амарах сүрэхтэр» диэн волонтерскай ааксыйа Бүтүн Арассыыйатааҕы волонтердар DOBRO.RU саайтарын нөҥүө барда. Ол курдук, бу ааксыйаҕа кыттыбыт үөрэнээччилэр саайтка киирэн волонтер быһыытынан регистрация ааһан, «Амарах сүрэхтэр» диэн ааксыйаҕа кыттыыны ыллылар. Хас биирдии кыттыбыт үөрэнээччилэргэ электроннай волонтерскай киниискэлэригэр кыттыбыттарын туһунан сурулунна, кыттыбыттарын бигэргэтэр туоһу суруктар туттарылыннылар. Инникитин оҕолор элбэх үтүө санаа волонтерскай хамсааһыныгар кытталларыгар, бэйэлэрэ кэлин итинник ааксыйалары тэрийэн үлэлииллэригэр улахан хардыы буолуо диэн тэрийээччилэр эрэнэллэр. Ити курдук, улууспутугар тимуровскай үлэттэн саҕалаан волонтерскай хамсааһын ситимин быспакка салҕанан көлүөнэлэри ситимниир үтүө санааланыы дьыалата сайдан бары нэһилиэктэри хабан үлэлиирэ хайҕабыллаах дьыала буолар.
