Наукаҕа бастакы хардыылар

“Үөрэҕирии” национальнай бырайыак чэрчитинэн «Успех каждого ребенка» федеральнай бырайыак Арассыыйаҕа былааннаахтык үлэлиир. Бу хайысхаҕа «Интеграция» национальнай система ыкса ситимнээх үлэни ыытар. Ол курдук, наукаҕа дьоҕурдаах оҕолору өйөөһүн, кинилэргэ билиилэрэ хаҥыырыгар, үөрэнэллэригэр көмө буолаллар. Быйыл «Интеграция» национальнай система тэрийэн ыыппыт «Наукаҕа бастакы хардыылар» научнай-чинчийэр үлэлэр конкурстарыгар Арассыыйа регионнарыттан элбэх оҕолор кыттыыны ыллылар. Бу конкурска Г.Т.Семенов аатынан Хадан орто оскуолатын 4 кылааһын үөрэнээччитэ Злата Чойнова лауреат буолла. «Влияние газированных напитков на жизнедеятельность организма» дакылаата экспертар улахан сыанабылларын ылла. Научнай салайааччыта- Хадан орто оскуолатын биологияҕа, химияҕа учуутала Семен Меркурьевич Тимофеев. Злата ахсынньы 13-14 күннэригэр Москва куоракка ыытыллар «Наукаҕа бастакы хардыылар» ХХХ Бүтүн Арассыыйатааҕы конференцияҕа кыттарга ыҥырыы тутта. Бу конференцияҕа Хадан орто оскуолатыттан Сунтаар улууһун, Саха Республикатын чиэһин көмүскүү барар Злата Чойноваҕа баҕарабыт ситиһиини, кыайыыны!

Добавить комментарий