Сылын аайы ыытыллар алын сүһүөх үөрэнээччилэрин кытары улуус Аҕа баһылыгын көрсүһүүтэ

Тохсунньу 23 күнүгэр улуус дьаһалтатын аактабай саалатыгар Аан дойду уонна российскай таһымнаах куонкурстар, научно-практическай конференциялар, курэхтэр кыайыылахтарын кытары улуус Аҕа баһылыгын көрсүһүүтэ буолла. Уопсайа 22 алын сүһүөх үөрэнээччилэрэ кыттыыны ыллылар. Оҕолор бары үөрэх туйгуннара, спортсменнар, араас куонкурстар кыайыылаахтара.
Тэрээһини төрдүс кылаас үөрэнээччитэ Поскачина Найыына хомус дьүрүскэн тыаһынан арыйда. Ол кэннэ улуус Аҕа баһылыга Анатолий Григорьев уонна үөрэҕирии начальнига Альберт Иванов эҕэрдэ тылларын эттилэр. Инники кэскиллэригэр уонна кинилэр учууталларыгар ону кытта төрөппүттэригэр улахан махталларын биллэрдилэр.
Салҕыы наҕараада чааһа буолла. Хас биирдии оҕоҕо грамота, бэлэх туттардылар. Үөрэнээччилэр Аҕа баһылыкка оскуолаларын, дьарыктарын туһунан кэпсээтилэр, ыйытыктарын биэрдилэр, аҕа дьон сүбэтин иһиттилэр. Анатолий Григорьев оҕолор долгутуулаах ыйытыктарын сөҕө иһиттэ. Холобур, Устье, Кириэстээх нэһилиэктэр аннынан Бүлүү өрүһү туоруур муоста тутуута, бэйдиэ сылдьар ыттарга хайдах дьаһал ылыахха сөбүн туһунан, оскуола тутуутун, баһылык оҕо сылдьан туох идэлээх киһи буолуон баҕарарын, тугунан ордук сөбүлээн дьарыктанарын интэриэһиргээн ыйыттылар. Түмүккэ төрдүс кылаас үөрэнэччитэ Тен Алгыстаан «Сахам ата» ырыатын бэлэх уунна.
Сылын аайы ыытыллар улуус баһылыгын кытары көрсүһуу үөрэх туйгуннарын, куонкурстар кыайыылаахтарын, бастыҥ спорстменнары, көхтөөх үөрэнээччилэри өссө үрдүк ситииһиилэргэ кынаттыыр, сирдиир сыаллаах буолар. Ити курдук, оҕолор улуус баһылыгын кытары көрсүһүүгэ сылдьан, санаа атастаһан, үөрэн-көтөн тарҕастылар.

Добавить комментарий