Олунньу 28 күнүгэр Сунтаар И. С. Иванов аатынан 2-с нүөмэрдээх оскуолатыгар «Сунтаар улууһугар саха тылын уонна литэрэтиирэтин бастыҥ учуутала – 2023» профессиональнай күрэс буолан ааста.
Куонкурус түөрт түһүмэҕинэн саха тылын уонна литэрэтиирэтин учууталларын аатын-суолун үрдэтэр, педагогическай сатабылларын таһымнарын сайыннарар уонна бастыҥ үөрэтээччини быһаарар соруктаах ыытылынна.
Тэрээһин үөрүүлээх аһыллыытыгар Сунтаар улууһун аҕа баһылыгын социальнай боппуруостарга солбуйааччыта Гаврил Еремеев, үөрэх салалтатын салайааччытын бастакы солбуйааччыта Елена Васильева уонна үөрэх салалтатыгар нуучча, саха тылларын мөтүөдьүкэтигэр сүрүннүүр идэлээх үлэһит Татьяна Жиркова куонкурус кыттааччыларын эҕэрдэлээтилэр, ситиһиилэри баҕардылар.
Уопсайа Сунтаар улууһун 7 талааннаах, сатабыллаах учууталлара кыттан, 4 түһүмэҕи аастылар: уруок, маастар-кылааһы ыыттылар, бэйэлэрин билиһиннэрдилэр, пресс-конференция көрүҥүнэн санааларын үллэһиннилэр. Пресс-конференцияны иилээн-саҕалаан Сунтаардааҕы 2-с нүөмэрдээх оскуола саха тылыгар уонна литэрэтиирэтигэр учуутала Сардаана Афанасьева ыытта. Кыттааччылар учугэйдик бэлэмнэнэн кэлбиттэр, үлэлэрин таһымнарын саҥаран-иҥэрэн, оҕолордуун биир тылы булан, умсугутан, үлэлээтилэр, хас биирдии кыттааччы ураты көрүүлээҕэ, санаалааҕа билиннэ.
Улуустааҕы куонкурус муҥутуур кыайыылааҕынан Аллаҥа орто оскуолатын учуутала Любовь Прокопьевна Уарова буолла. Киниэхэ “Кылаан кыайыылаах» Добун сурук туттарылынна. I үрдэл Хайҕал сурук Элгээйи орто оскуолатын учууталыгар Людмила Николаевна Павловаҕа туттарылынна. II үрдэл – Бордоҥ орто оскуолатын учууталыгар Сусанна Николаевна Павловаҕа, III үрдэл – Сунтаардааҕы 3-с нүөмэрдээх орто оскуолатын учууталыгар Анна Анатольевна Алексееваҕа. Ону таһынан үс педагогка анал аат иҥэрилиннэ, кыттааччыларга Сунтаар улууһун аҕа баһылыгын Анатолий Григорьев Махтал суруга туттарылынна. Кыттааччылар бэйэлэрин оскуолаларын чиэһин олус үчүгэйдик көмускээтилэр. Талбыт идэлэрин таптыыллара, саха тылын уонна литэрэтиирэтин үүнүүтүгэр-сайдыытыгар үлэлэһэр кыхтаахтара көстөр. Бу күрэскэ ылбыт опыттара салҕыы үлэлииллэригэр көмө буолуо.
