Коррекционнай оскуола — олоҕурбут үгэстэри тутуһан бигэ тирэхтээхтик үлэлиир. 25 сыл устатыгар оскуола кэлэктиибэ интэринээт сайдарыгар, материальнай-техническэй база бөҕөргүүрүгэр, улууска анал үөрэхтээһин тэнийэригэр, доруобуйаларынан хааччахтаах оҕолор уопсастыба толору бырааптаах чилиэнэ буолалларын ситиһиигэ айымньылаахтык үлэлиир.
Бу сыллар усталарыгар оскуолаҕа да, үөрэх систиэмэтигэр да элбэх уларыйыылар буолбуттара. Ол эрэн учууталлар маастырыстыбалара, көрөр-иитэр персонал оҕолорго истиҥ сыһыаннара уларыйбат.
Оскуола үлэтин хайысхата — оҕону иитии, үөрэтии эрэ буолбакка, оҕо доруобуйатын тупсарыы уонна оҕону личность быһыытынан сайыннарыы буолар.
Бу күн оскуола дириэктэригэр Анисия Игнатьеваҕа уонна кэлэктиипкэ элбэх истиҥ эҕэрдэлэр, махтал тыллара уонна баҕа санаалар этилиннилэр. Бэлэхтэр, сертификаттар, эҕэрдэ суруктар туттарылыннылар уонна биирдиилээн үлэһиттэри наҕараадалааһын буолла.
Сунтаар улууһун аҕа баһылыгын социальнай уонна имиджевай бэлиитикэҕэ солбуйааччы Гаврил Еремеев, үөрэҕирии управлениетын салайааччытын бастакы солбуйааччы Елена Васильева, үөрэх профсоюһун бэрэссэдээтэлэ Анатолий Новиков, ыччат отделын салайааччыта Трофим Иванов, улуус оскуолаларын дириэктэрдэрэ уонна Ленскэйтэн, Мииринэйтэн ыҥырыылаах ыалдьыттар эҕэрдэ тылларын этиилэр.
Бырааһынньыкка үлэлээн ааспыт үтүөкэн дьону, оскуола сайдыытыгар бэйэлэрин сүдү кылааттарын киллэрбит учууталлары ахтан-санаан аастылар. Оскуола иитиллээччилэрин, үлэһиттэрин бэрт сэргэх кэнсиэртэрин мустубут дьон астына көрдүлэр.
Кэлиҥҥи сылларга үөрэхтээһиҥҥэ улахан болҕомто уурулунна, учууталлар доруобуйаларынан хааччахтаах оҕолор хаачыстыбалаах үөрэҕи ылалларыгар үлэлии-хамныы сылдьаллар. Ол курдук, улууска, өрөспүүбүлүкэҕэ ыытыллар сэминээрдэргэ, күрэхтэргэ кытталлар, үгүс ситиһиилээхтэр. Оскуола иһигэр элбэх тэрээһин ыытыллар, араас бырайыактарга үлэлэһэллэр.
Эһиэхэ, оҕолорго амарах сыһыаҥҥыт, күннэтэ кыһамньыгыт, истиҥ тапталгыт иһин, ис-сүрэхтэн этиллэр махталбытын тиэрдэбит.
Эһигини өссө төгүл бу кэрэ-бэлиэ күҥҥүтүнэн, үбүлүөйдээх сылгытынан эҕэрдэлээн туран, оскуолаҕытыгар куруук сылаас сыһыаны, истиҥ иэйиини, таһаарыылаах үлэни баҕарабыт! Инники былааҥҥыт киэҥ кэскиллээх буоллун диэн алгыспытын аныыбыт. Хаһан даҕаны үтүө санааҕыт уостубатын, үлэҕитигэр бэриниигит умуллубатын!
