Улуус үөрэнээччилэригэр бастакы «Бэргэн» ытыы күрэҕэ.

Кулун тутар 17 күнүгэр Сунтаар 3 №-дээх орто оскуола уонна оҕо спордун резервэ оскуолатын тэрийиитинэн анал байыаннай дьайыыга сырдык тыынын толук уурбут үөрэнээччибит, Григорьев Ньургун Николаевич, сырдык кэриэһигэр аналлаах «Бэргэн» буулдьанан биирдиилээн ытыыга бастакы улуустааҕы күрэх ыытылынна. Улуус 14 оскуолатыттан (Бордоҥ, Бүлүүчээн, Дьаархан, Күүкэй, Күндэйэ, Сунтаар 1, 2, 3 №-дээх, Сунтаардааҕы лицей, гимназия, Туойдаах, Устье, Сиэйэ, Хоро) барыта 54 бэргэн ытааччы сэлэлии хааман киирдилэр.

Хаамыыны оскуолабыт физкультура учуутала Александр Валерьевич Уаров салайан киллэрдэ. Күрэҕи оскуола директора Андрей Николаевич Николаев арыйда. «Бэргэн» ытыы күрэҕэ сыл аайы ыытылларын эттэ. Улуус баһылыга Анатолий Васильевич Григорьев бу күрэх салгыы Бүлүү бөлөх, онтон республиканскай таһымнаах буоларыгар баҕа санаатын эттэ. Ньургун төрөппүттэригэр бу бэлиэ күнүнэн эҕэрдэ сурук уонна сэмэй бэлэх туттарда. Ийэтэ Лилия Леонидовна үөрэн, уйадыйан туран кыттааччылары эҕэрдэлээтэ. Ньургун бииргэ төрөөбүт убайа Николай Григорьев анал байыаннай дьайыыга сылдьар сулууспатыттан күрэҕи тэрийээччилэргэ махталын, кыттааччыларга эҕэрдэтин эттэ. Военкомат начальнига Игорь Семенович Данилов бу дьайыыга Сунтаар улууһуттан элбэх ыччат ытык иэстэрин төлүү сылдьалларын иһитиннэрдэ. Тыл эттилэр: Спорт оскуола директора Данилов Д.А., олохтоох дьаһалтаттан Петров П.В., ыччат салаатын салайааччыта Иванов Т.А., Кинилэр оҕолорго анаан патриотическай санаа, дойдуга ытыктабыл күүһүрүөхтээҕин туһунан эттилэр уонна ким бэлэмнээх, кыахтаах кыайарыгар алҕаатылар. Ньургун Григорьев Бордоҥ оскуолатыгар үөрэммит кылааһын салайааччыта Павлова Сусанна Николаевна уол үтүө санаалааҕын, боччумнааҕын, дуоспуруннааҕын, оҕо эрдэҕиттэн эр киһилии иитиилээҕин сылаастык ахтан, санаан ааста. Сүрүннүүр судьуйа Николаев Александр Алексеевич кыраҕы харахтаах хоттун, сытыы харахтаах кыайдын диэнинэн күрэх саҕаланна.

Күрэх түмүгүнэн: 7-8 кылаас кыргыттарыгар: 1 миэстэ- Саввинова Наталия (Сунтаардааҕы гимназия, 8 кылаас) 2 миэстэ- Исагалиева Карнелия (Күндэйэ, 8 кылаас) 3 миэстэ- Семенова Катерина (Күндэйэ, 8 кылаас). 9-11 кылаас кыргыттарыгар: 1 миэстэ — Евсеева Диана (Күндэйэ, 9 кылаас) 2 миэстэ — Николаева Варвара (Сиэйэ, 11 кылаас) 3 миэстэ — Егорова Констана (Сунтаар 2 №дээх оскуола, 10 кылаас). 7-8 кылаас уолаттарыгар: 1 миэстэ — Винокуров Артём (Сунтаардааҕы лицей, 8 кылаас) 2 миэстэ — Иванов Амирхан (Устье, 7 кылаас) 3 миэстэ- Попов Олег (Сунтаар 3 №-дээх оскуола). 9-11 кылаас уолаттарыгар: 1 миэстэ — Данилов Николай (Бүлүүчээн, 11 кылаас) 2 миэстэ -Тереясов Ярослав (Бордоҥ, 9 кылаас) 3 миэстэ — Лаптев Роман (Устье, 9 кылаас). Анал ааттар иҥэриннилэр: «Юный стрелок» — Корякин Егор (Устье, 6 кылаас) Григорьев Ньургун Николаевичка төрөппүт анал бэлэҕэ (Дьаархан, 9 кылаас). «Воля к победе» — Иванова Инга (Сунтаар 3 №-дээх оскуолата, 11 кылаас). Ньургун аҕатын, Николай Николаевич, бииргэ сулууспалаабыт доҕотторо анал бэлэхтэрин күрэххэ ситиһиилээхтик кыттыбыт оҕолорго туттардылар. Күрэх муҥутуур кыайыылааҕа Сунтаардааҕы политехническай лицей 8 кылааһын үөрэнээччитэ Винокуров Артём буолла. Кини 30 тыһыынча уу харчынан уонна ньирэй наҕараадаланна. Ньургун Григорьев ийэтэ бүгүҥҥү күнү тэрийээччилэргэ, Сунтаар 3 №-дээх оскуолатыгар уонна кыттааччыларга барҕа махталын тириэртэ. Спонсордаабыт тэрилтэлэрбитигигэр махталбыт муҥура суох.

Добавить комментарий