Ил Дархан 2022 сыллаах гранын чэрчитинэн Элгээйи орто оскуолатын ахсыс, тохсус, онус уонна уон биирис кылааһын үөрэнээччилэрэ Мииринэйдээҕи политехническай институтка профориентационнай тэрээһиҥҥэ кыттан кэллилэр.
Ол курдук үөрэнээччилэр Мииринэйдээҕи политехническай институт сүрүн үөрэнэр куорпуһугар сырыттылар. Институтка оҕолору кафедра үлэһиттэрэ үөрэ-көтө көрүстүлэр. Хас биирдии преподаватель оҕолорго анаан араас опыттары, лабораторнай үлэлэри, араас станоктар хайдах үлэлииллэрин көрдөрдүлэр. Маны таһынан оҕолор институтка ханнык экзаменнары туттаран киирэллэрин, үөрэххэ киирэргэ туох докумуон наадатын сиһилии кэпсээн биэрдилэр. Уопсайга киирии быраабылатын, стипендия боппуруоһун эмиэ сырдаттылар. Маннык экксурсиялар буолаллара үөрэнээччилэргэ инники үлэлэрин булалларыгар улахан төһүү көмө буолуо диэн эрэнэбит. Бу тэрээһини «Э-ХОС» уопсастыбаннай тэрилтэ уонна Сунтаар улууһун үөрэҕин салалтата тэрийэн ыыттылар.
