Сунтаар улууһугар ыытыллар С. А. Зверев күнүн көрсө, кини аатын сүгэр Түбэй-Дьаархан орто оскуолатыгар, «Эрэл» оҕо түмсүүтүн проегынан үгэскэ кубулуйан бэһис төгүлүн ыытыллар «Хайыһарынан десант» тэрээһин буолан ааста. Быйылгы ыалдьыттарбытынан Элгээйи, Кутана, Сиэйэ оскуолаларын 11 кылаастарын үөрэнээччилэрэ буоллулар. Тэрээһиммит үөрүүлээх линейкаттан саҕаланна. Оҕолор ыҥырыылаах ыалдьыттар этиилэрин, С. А. Зверев туһунан саха тылын учуутала Титова Л. С. сырдатыытын иһиттилэр, үгэс быһыытынан 9 мэҥэ хамнаныыны толордулар, саха сиэринэн оһуохайдаатылар. Ол кэннэ, төһө да халлааммыт тыал-хаар буоллар, кэлбит ыалдьыттары кытта 11 кылаас оҕолоро ким хайыһарынан, ким сатыы, ким массыынанан Ыгыатта5а таҕыстылар. С. А. Зверев музей-уһаайбатын методиһа Афанасьева Л. Н. көмүлүөк оһоҕу оттон, алаадьылаах бырпа5ынан көрүстэ. Оҕолор 3 бөлөххө арахсан музей көрдүлэр. Музейнай комплекс үлэһиттэрэ Афанасьева Л. Н., Саввинова Н. Р., Омуков Н. А. оҕолору батыһыннара сылдьан С. А. Зверев олоҕун, олорбут дьиэтин, туттубут тэриллэрин уо.д.а кэпсээтилэр. Салҕыы квест оонньуу тэриллэн оҕолор Ыгыатта устун эрдэ кистэнэн бэлэмнэниллибит сорудахтары булан толорон сүүрдүлэр-көттүлэр.
Тэрээһиҥҥэ уопсайа 32 оҕо, 6 учуутал уонна С. А. Зверев аатынан улуустаа5ы музейнай комплекс үлэһиттэрэ кыттыыны ыллылар. Хас биирдии үөрэнээччигэ, кэлбит учууталларга улуус хабааннаах тэрээһиҥҥэ кыттыбыттарын туоһулуур суруктар туттарылыннылар
