Манна Сунтаар оройуонун педагогтара, үөрэх тэрилтэлэрин салайааччылара, эбии үөрэхтээһин үлэһиттэрэ, ыҥырыылаах ыалдьыттар мустан үөрэх салалтата тэрийбит дьаһалларыгар кыттыыны ылыахтара. Тэрээһиҥҥэ үөрэх салалтатын мусуойа туруорбут «Cунтаар уһуйааччы учууталлара үйэлэри уҥуордаан» быыстапкаттан саҕалаан, улууска үөрэх эйгэтин сайыннарыытыгар тиийэ кэпсэтиэхтэрэ.
Үөрэх салалтатын салайааччыта Альберт Иванов «Пути развития образования Сунтарского улуса в современных реалиях» диэн мунньах сүрүн дакылаатын иһитиннэрдэ. Манна сыллааҕы үлэ түмүгүн, материальнай-техническай база сайыннарыытыгар күүстээх үлэ бара турарын, үөрэх хаачыстыбатын мустубут дьон билистэ. Альберт Иванов педагогтарга үөрэх хаачыстыбата тупсарыгар үлэлииргэ сорук туруорда, сүрүн былааннары торумнаан, ол туолуутугар үлэ барыахтааҕын тоһоҕолоон бэлиэтээтэ. Улуус аҕа баһылыга Анатолий Григорьев быйыл Россияҕа суолталаах сыл биллэриллибитин бэлиэтээн туран, үөрэх үлэһиттэрэ өссө үрдүк таһымҥа тахсалларын, саҥа үөрэх сыла ситиһиилээх буоларыгар баҕа санаатын тиэртэ. Ону тэҥэ бэйэлэрин киирии тылларын эттилэр ыҥырыылаах ыалдьыттар: Саха Ѳрѳспүүбүлүкэтин Ил Тумэн бэрэссэдээтэлэ Андрей Николаев, Саха Ѳрѳспүүбүлүкэтин үлэ уонна социальнай сайдыы салайааччытын солбуйааччыта Афанасий Постников.
Сүбэ мунньах үөрүүлээх чааһыгар өр сылларга үлэлээн кэлбит сылларын, үөрэх сайдыытыгар сүдү кылааттарын иһин наҕараада биэртэлээтилэр, бэлиэ туттартаатылар. Ол кэннэ үөрэх тэрилтэлэрин салайааччыларын чиэстээһин буолла, үтүө суобастаахтык үлэлээн ааспыт сылларыгар махтанан туран эҕэрдэ тылларын эттилэр. Салгыы эбиэт кэнниттэн үөрэх сайдыытын тыҥаан турар боппуруостарын туспа былаһааккаларынан ырытыахтара.
