“Үөрэҕирии” национальнай федеральнай программа иитинэн, бүтүн Россия үрдүнэн, алтынньы ый 16-22 күннэригэр, төрөппүттэргэ аналлаах психолого-педагогическай, методическай боппуруостарга консультациялыыр нэдиэлэ ыытылынна. Ол чэрчитинэн, биһиги улууска алтынньы ый 20 күнүгэр, доруобуйаларынан хааччахтаах оҕолор төрөппүттэригэр аналлаах семинар-практикум буолла. Семинар В. Г. Павлов аатынан Сунтаардааҕы начальнай оскуола базатыгар бэрт тэрээһиннээхтик ыытылынна. Сунтаардааҕы коррекционнай интернат- оскуолаттан, П. Х. Староватов аатынан Элгээйи орто, М.И. Герасимов аатынан санаторнай-лесной уонна В.Г. Павлов аатынан алын сүһүөх оскуолалар учууталлара, иитээччилэрэ, анал үөрэхтээх специалистар, семинар-практикум сүрүн тематынан үлэлэрин опытын атастастылар, төрөппүттэргэ сүбэ-ама биэрдилэр. Доруобуйаларынан хааччахтаах оҕолор төрөппүттэрэ туһалаах сүбэлэри , мунаарар боппуруостарыгар сөптөөх хоруйдары ыланнар астыннылар уонна махталларын биллэрдилэр.
Доруобуйаларынан хааччахтаах оҕолорун, төрөппүттэр үксүлэрэ, оскуолаҕа аҕалан кылааска оҕолордуун бииргэ үөрэттэрэллэрин ордороллор. Биллэн турар, доруобуйатыгар кэһиллиилээх оҕо биир саастыылаахтарын кытта алтыһара, бииргэ үөрэнэрэ кини сайдыытыгар, олоххо бэлэмнээх буоларыгар улахан көмөлөөх буолара саарбахтаммат. Ол гынан баран маннык оҕону үөрэтии, иитии учууталтан эбии билиини, ураты сыһыаны эрэйэрэ биллэр. Доруобуйаларыгар хааччахтаах оҕолору кытта уруок бириэмэтигэр үлэ уратыларын, оҕолор майгыларын учуоттааһын, кэллэктиип иһигэр үөскүүр сыһыаннаһыылары сүрүннээһин курдук уустук боппуруостарга Сунтаардааҕы коррекционнай интернат-оскуола үлэһиттэрэ О. Н. Черепанова, О.М. Назарова, М.П. Федорова олус туһалаах иһиттиннэриилэри оҥордулар.
Доруобай уонна доруобуйаларынан хааччахтаах оҕолору биир кылааска холбоон үөрэтиигэ программа араас варианнарын туттууга, оҕолор өйдүүр, толкуйдуур дьоҕурдарын сайыннарыыга, саҥаларын дефектэрин көннөрүүгэ араас ньымалары туһаныы боппуруостарыгар, тьютордар үлэлэрин тэрийиигэ В.Г.Павлов аатынан Сунтаар алын сүһүөх оскуолатын эдэр үлэһиттэрэ психолог К.В.Прокопьева , логопедтар С.В. Аммосова, Дь.Н. Семенов иһитиннэриилэрин, тренинг ыыппыттарын семинар кыттыылаахтара аһара сэргээтилэр уонна астыннылар. Эдэр үлэһиттэргэ үлэлэригэр ситиһиилэри баҕардылар.
Төрөппүттэргэ доруобуйаларыгар хааччахтаах оҕолоругар дьиэтээҕи усулуобуйаны тэрийиигэ, кинилэргэ ураты эйэҕэс сыһыаны олохтуурга сүбэлэри, дьиэтээҕи үлэҕэ сыһыаран кыратыттан бэйэтин көрүнэ үөрэнэригэр бэлэмнииргэ, өйүн-санаатын, этин-сиинин сайыннарыыга болҕомтолорун ууралларыгар, оҕо улаатан туспа олоруохтааҕын эрдэттэн учуоттаан, олоххо бэлэмнээх киһини иитэн таһаарыы дьиэ кэргэн сүрүн соруга буоларын, өр сылларга учууталлаабыт, билигин В.Г.Павлов аатынан Сунтаардааҕы алын сүһүөх оскуолаҕа социальнай педагогунан үлэлиир Т.И.Герасимова бэйэтин этиитигэр сүрүн болҕомтотун туһаайда.
Семинары Сунтаардааҕы үөрэх управлениетын үлэһитэ М.И. Попова уонна В.Г. Павлов аатынан Сунтаардааҕы алын сүһүөх оскуола дириэктэри үөрэх чааһыгар солбуйааччы М.И. Аргунова иилээн-саҕалаан тэрийэн ыыттылар.
