Бугун, сэтинньи 3 күнүгэр, Сунтаар сэлиэнньэтигэр «Ньургуһун» уһуйааҥҥа «НьуStudio» полилингвальнай студия арылынна. Уһуйаан үлэһиттэрэ “Создание условий для развития детей школьного возраста” программа чэрчитинэн «ИННОСФЕРА 2023» оҕо инновационнай кииннэрин өйүүр куонкуруска кыайбыттара. Бу куонкурус сыалынан оҕолорго информационнай технологиялары туһанан бырайыактыыр, инновациялыыр дьоҕурдарын сайыннарыы буолар.
Үөрүүлээх күнүнэн Сунтаар улууһун баһылыгын социальнай боппуруостарга уонна имиджевай политикаҕа солбуйааччы Гаврил ЕРЕМЕЕВ уһуйаан үлэһиттэригэр, оҕолорго, кинилэр төрөппүттэригэр улуус дьаһалтатын аатыттан эҕэрдэ тылларын тиэртэ. Үөрэх салалтатын салайааччытын солбуйааччыта Борис ВАСИЛЬЕВ уһуйаан үлэһиттэрин үлэлэрин хайҕаан туран, оҕолор улаатан оскуолаҕа тахсан иһэн бу билиилэрин, сатабылларын сүтэрбэккэлэр салгыы дьарыктанан иһиэхтэрэ диэн баҕа санаатын эттэ.
Студияҕа араас графическай планшеттар, компьютердар, принтер, квадрокоптер, виртуальнай реальность ачыкыта кытта баар. Ону таһынан о5олор бэйэлэрэ пластилинынан, легонан оҥорбут геройдарынан мультик устарга үөрэниэхтэрэ. Онон бу медистудия оҕолор сайдалларыгар төһүү күүс буолуоҕа диэн эрэнэбит. Кабинет иһэ иитиллээччилэр дьарыктаныан эрэ курдук, киэҥ-куоҥ, ыраас, сырдык, тупсаҕай. Сунтаар улууһун олохтоох дизайнера Лена Фрейзер баҕа санаатынан бу хоһу оҥорон таһаарбыт. Кырачаан оҕолор техниканы, телефону, компьютеры хайыы үйэ улахан дьоннооҕор эрдэ, түргэнник баһылыахтара. Сөптөөхтүк баһылыылларыгар бу бырайыак төһүү олук буолар. Медиастудияҕа үс тылынан биэрии устар, хаһыат таһаарар уонна мультиктары үөрэтэр былааннаахтар.
Ньургуһун уһуйаан үлэһиттэрин улахан баҕа санаалара олоххо киирбитинэн үөрүүлэрин үллэстэллэр. Улууспут үлэтигэр, үүнэн-сайдан иһиитигэр тус кылааттарын киллэрэллэрин бэлиэтиибит уонна киэн туттабыт. Кэлэр кэнчээри кэскилбит сайдарыгар сүдү күүс буолалларыгар махталбытын тиэрдэбит.
