Уһулуччулаах учуутал, кыраайы үөрэтээччи, чинчийээччи, Үлэ Дьоруойа Петр Хрисанфович Староватов төрөөбүтэ 150 сыллаах үбүлүөйүн Сунтаар улууһугар түмүктүүр тэрээһин — «2 регионнааҕы Староватовтыы ааҕыылар” кини аатын 95 сыл чиэстээхтик сүгэр Элгээйи орто уопсай үөрэхтээһин оскуолатыгар ахсынньы 7 күнүгэр үрдүк таһымҥа буолан ааста.
Үөрүүлээх тэрээһин олохтоох кулуупка режиссер, Саха республикатын культуратын туйгуна Э.С.Николаева туруорбут П.Х.Староватов олоҕун көрдөрөр дьүһүйүүтүттэн саҕаланна. Оскуолабыт учууталлара, нэһилиэк олохтоохторо үйэлэри уҥуордаан ааттана олорор ытык киһибит олоҕун ыалдьыттарга итэҕэтиилээхтик оонньоон көрдөрөн тэрээһини ордук киэргэттилэр.
Улууспут баһылыга А.В.Григорьев П.Х.Староватов Элгээйигэ үлэлээн ааспыт кэмнэрэ Сахабыт сирин сайдыытыгар сүдү суолталаагын бэлиэтээн туран Ил Түмэн грамоталарын, Сунтаар улууьун үрдүкү наҕараадаларын туттартаата.
Эҕэрдэ тыллары Элгээйи нэһилиэгин баһылыга П.А.Григорьев, Сунтаар улууһун үөрэҕириитин салаатын начальнигын солбуйааччы Б.Н. Васильев, оскуолабыт дириэктэрэ С.В.Игнатьева эттилэр. Математика учуутала Туйара Борисовна Евсеева өр сыллаах таһаарыылаах үлэтин иһин Саха Республикатын үөрэҕириитин туйгуна буолла. Россияҕа педагог уонна аҕа сүбэһит сылынан оскуола быйыл олохтообут П.Х.Староватов аатынан стипендиятын алын кылаас наставник учуутала РФ уопсай үөрэхтээһинин бочуоттаах үлэһитигэр Лена Васильевна Ивановаҕа туттардылар.
П.Х.Староватов 150 сылыгар уонна Элгээйи – Дьокуускай бастакы сатыы хаамыы 35 сылыгар анаан маҥнайгы алмаас көстүбүт сиригэр Соколинайга Элгээйиттэн 100 км үөрэнээччилэрдиин сатыы хаамыы кыттыылаахтарын чиэстээтилэр.
“2 Староватовтыы ааҕыыларга” 4 Бүлүү, Нам, Миирнэй улуустарыттан, Дьокуускайтан барыта 116 үөрэнээччи, студент, педагог 22 оскуолаттан, 3 музейтан, 2 оскуола иннинээҕи оҕо тэрилтэлэриттэн кыттан Дьоруойбут аатын үйэтитиигэ, кыраайы үөрэтиигэ, олохтоох музейдар үлэлэрин иитиигэ-үөрэтиигэ туһаныыга опыттарын түмэн, бырайыактарын оҥорон 9 араас секцияҕа экспертэр дьүүллэригэр таһаардылар.
Кыайыылаахтарынан улахан дьоҥҥо Элгээйи оскуолатын алын кылааһын учууталларын бөлөҕө, Павлова Людмила Николаевна (Элгээйи оскуолата), Августина Васильевна Аркадий Анатольевич Архангельскайдар (Түбэй оскуолата), Иванова Саргылана Моисеевна (Сунтаар 3 оскуолата), Егорова Мария Николаевна, Егорова Виктория Владимировна (Күндэйэ оскуолата) буоллулар. Оҕолорго Татаканова Алтынай, Егоров Дамир (Элгээйи оскуолата), Третьяков Антон (Кутана оскуолата), Илларионова Вилена, Архангельскай Арылхан (Түбэй оскуолата) үлэлэрэ бастыҥнарынан буоллулар.
Күүтүүлээх күндү ыалдьыттарынан П.Х.Староватов аатынан Бүлүүтээҕи кыраайы үөрэтэр музей үлэһиттэрэ буоллулар. Музей салайааччыта Т.Н.Афанасьева художник Е.Н. Маяровскай төрөөбүт кыраайга, айылҕаҕа тапталы хоһуйар үлэлэрин быыстапкатын билиһиннэрдэ. Улуус аҕа баһылыгын солбуйааччы Г.М.Еремеев үөрүүлээх тэрээһиммитин түмүктээтэ. Оҕолор, учууталлар эҕэрдэ нүөмэрдэрэ киэргэттэ.
П.Х.Староватов аатынан Элгээйи орто оскуолатыгар бу күн ыалдьыттаабыт, Староватовскай ааҕыыларга кыттыбыт дьон Дьоруой бэлиэлээх сувенирдаах, кини туһунан кинигэлээх, «Күрүлгэн” сурунааллаах уһулуччулаах учуутал, кыраайы үөрэтээччи, чинчийээччи, Үлэ Дьоруойа Петр Хрисанфович Староватов туһунан өссө да элбэҕи үөрэтэр, билэр, кини олоҕун холобур оҥостор баҕалаах тарҕастылар.
Улууспут, нэһилиэкпит аҕа баһылыктарыгар, үөрэҕирии салалтатыгар, Оһуор культура киинигэр, Бүлүүтээҕи кыраайы үөрэтэр музейга махталбын биллэрэбин.
П. Х. Староватов аатынан Элгээйи орто уопсай
үөрэхтээһин оскуолатын дириэктэрэ,
РФ уопсай үөрэхтээһинин бочуоттаах үлэһитэ Софья Васильевна Игнатьева
