Бүгүн, ахсынньы 14 күнүгэр, С. А. Зверев – Кыыл Уолун аатынан улуустааҕы норуот айымньытын киинигэр Педагог уонна Аҕа сүбэһит сылын түмүктүүр тэрээһин буолан ааста. Бу сыл Россия президенин уурааҕынан Педагог уонна Аҕа сүбэһит сылынан биллэриллибитэ. Учуутал идэтин престиһин үрдэтэр, эдэр учууталлары үөрэҕирии эйгэтигэр угуйар, кинилэргэ аҕа сүбэһиттэр киэн билиилэрин, баай опыттарын үллэстэр, дьоһуннаах кылааттарын үйэтитэр, үөрэх хаачыстыбатын үрдэтэр сыаллар-соруктар турбуттара.
Тэрээһин дьоро чааһыгар Сунтаар улууһун аҕа баһылыга Анатолий Григорьев быйыл улууспутугар үтүмэн элбэх былааннаах үлэлэр барбыттарын биллэрдэ. Үлэ улахан хайысхатынан учууталлар научнай-методическай үлэлэрин уонна профессиональнай таһымнарын үрдэтиигэ сыһыаннааҕын тоһоҕолоон бэлиэтээтэ. Улууспут баһылыга Сунтаар улууһун үөрэҕин сайдыытыгар таһаарыылаах үлэтин иһин Сунтаардааҕы технологическай колледж дириэктэригэр Гаврил Михайловка «Саха сирин инники эрэлэ» бэлиэни туттарда. Быйыл үөрэх эйгэтигэр СӨ үөрэх уонна наука министиэристибэтэ «Саха Өрөспүүбүлүкэтин инники көлүөнэлэрин пуондатын» анал бириэмийэтигэр ыыппыт күрэһин түмүгүнэн анал кыайыылаах дипломунан Наталья Максимова, Күндэйэ орто оскуолатын биология уонна химия учуутала, Алена Николаева, Сунтаардааҕы «Ньургуһун” оҕо сайдар киинин уһуйааччыта наҕараадаланнылар. Спорт эйгэтигэр өр сыллаах ситиһиилээх үлэтин иһин Саха Республикатыгар физическай култуура хамсааһынын 100 сыллаах үбүлүөйдээх анал бэлиэ Николаев Юрийга, Элгээйи орто оскуолатын бэтэрээн учууталыгар ананна.
Бүгүҥҥү үөрүүлээх күҥҥэ Россия үөрэҕин уонна наукатын миниистирин Сергей Кравцов видеоэҕэрдэтин мустубут дьон көрдө. ИЛ Түмэн депутата, хонтуруолунай комитет салайааччыта Андрей Николаев СӨ Ил Түмэн Судаарыстыбаннай мунньаҕын Бочуоттаах грамотатын үөрэх салалтатын салайааччытыгар Альберт Ивановка туттарда. СӨ судаарыстыбаннай мунньаҕын дьокутаата, СР “Барҕарыы” национальнай пуондатын салайааччыта Афанасий Постников, СӨ народнай учуутала, Сунтаардааҕы политехническай лицей дириэктэрэ Олег Сосин бэйэлэрин эҕэрдэ тылларын эттилэр.
Мантан салгыы уһулуччу ситиһиилээх итиэннэ араас таһымнаах куонкурустарга кыайыылаах учууталлары наҕараадалааһын үөрүүлэээх чааһа буолла. Сыл устата Сунтаар улууһун педагогтара республика араас былаһааккаларыгар көхтөөхтүк кыттыбыттара, форумнар, научнай-практическай конференциялар, квалификацияларын үрдэтэр куурустар, араас куонкурустар уонна тэрээһиннэр ыытыллыбыттара. «Учитель года», «Лучший воспитатель», «Директор года», «Сердце отдаю детям» уонна да араас күрэстэр үгэс буолбут интэриэһи тардыбыттара. Ол курдук, Республикатааҕы Бастыҥ Педагог уонна Аҕа сүбэһит күрэххэ Айсен Николаев Ил Дархан анал бириэмийэтин кыайыылааҕар Сунтаардааҕы В. Г. Павлов аатынан алын сүһүөх оскуолатын учууталыгар Галина Новиковаҕа Сунтаар улууһун Аҕа баһылыгын МАХТАЛ суруга туттарылынна. Ону тэҥэ үөрэх эйгэтигэр өр сыллаах бэриниилээх, таһаарыылаах үлэлэрин иһин «Саха Республикатын үөрэҕин бочуоттаах бэтэрээнэ» бэлиэннэн наҕараадаланнылар:
— Тамара Герасимова, Сунтаар алын сүһүөх учуутала;
— Зинаида Леонтьева, Тойбохойдооҕу Ньургуһун оҕо сайдар киинин иитээччитэ;
— Валентина Леонтьева, Бордоҥ орто оскуолатын бэтэрээн учуутала;
— Екатерина Попова, Сунтаар улууһун үөрэҕин салалтатын каадырынан хааччыйыы отделын сэбиэдиссэйэ.
Педагог уонна Аҕа сүбэһит сылын үтүө түмүктэрин бэлиэтиир бастыҥ үлэлээх, үрдүк ситиһиилээх, кэскиллээх кэнчээри ыччаты үөрэххэ-билиигэ уһуйан, үрдүккэ көтүппүт ытыктабыллаах учууталларга, иитээччилэргэ, эбии үөрэхтээһин педагогтарыгар Сунтаар улууһун Аҕа баһылыга анал бириэмийэтин туттарыы буолла. Ол курдук 18 үөрэх хайысхаларынан 69 үлэһит бэлиэтэннэ.
Тэрээһин иккис чааһа Сунтаардааҕы алын сүһүөх оскуолатыгар буолла. Толору астаах, итии чэйдээх остуолга ырыа-тойук аргыстаах иһирэх кэпсэтии мустубут дьону түмтэ. Улуус баһылыга, үөрэх салалтатын салайааччыта эҕэрдэ тылларын эттилэр. Үөрэх эйгэтин бэтэрээннэрин ахтыыларын сэргээн иһиттилэр. Бу курдук Педагог уонна Аҕа сүбэһит сылын түмүктүүр тэрээһин олус үрдүк таһымҥа ааста.
