Тохсунньу 9 күнүгэр Сунтаар улууһун Аҕа баһылыгын Ороһуоспатааҕы харыйата буолан ааста. 2023 сылга үрдүк ситиһиилэри ситиспит уопсайа 100 оҕо ыҥырылынна — үөрэҕирии туйгуннара, активистар, улуустааҕы, республикатааҕы, Бүтүн Россиятааҕы олимпиадалар уонна научнай-практическай конференциялар, спортивнай күрэхтэһиилэр кыайыылаахтара.
Үтүө үгэскэ кубулуйбут Сунтаар улууһун салайааччыларын кытары оҕолор көрсөн бэйэлэрин интэриэһиргиир ыйытыктарын биэрдилэр, баҕа санааларын эттилэр. Үөрүүлээх күн дьоро чааһын Сунтаардааҕы оҕо искусствотын оскуолатын үөрэнээччилэрин толоруутугар «Томороон Тымныы Хотун» диэн уус-уран театральнай дьүһүйүү арыйда. Салгыы улуус баһылыга Анатолий Григорьев эҕэрдэ тылын эттэ.
Ол кэннэ номинаннары чиэстээһин сиэрэ-туома ыытылынна. Быйыл бастыҥнартан бастыҥнар 5 номинациянан наҕараадаланнылар: «олимпиадниктар», «научнай-практическай конференция кыттыылаахтара», «талба таланнаахтар», «спортсменнар» уонна «активистар».
Тэрээһин Тымныы оҕонньор уонна Хаарчаана эҕэрдэлэринэн түмүктэннэ, Ороһуоспатааҕы харыйа бары кыттыылаахтарыгар смарт чаһыы уонна минньигэс бэлэх туттарылынна. Улуус баһылыгын Харыйатын кыттыылаахтарын үрдүк ситиһиилэринэн эҕэрдэлиибит. Улуус общественнай олоҕор салгыы даҕаны ситиһиилээх, актыыбынай кыттыыны баҕарабыт!
