Тохсунньу 24 күнүгэр Сунтаар 5 нүөмэрдээх «Ньургуһун» оҕо сайдар киинигэр эдэр педагог Алексеева Надежда Алексеевна уонна педагог- наставник Николаева Алена Гаврильевна авторскай семинардара «Наставничество — путь к успеху» диэн теманан салайтаран ыытылынна. Манна уопсайа Сунтаар улууһун араас нэһилиэктэрин оҕо уһуйааннарыттан 29 педагог кыттыыны ылла.
Семинар старшай бөлөх иитиллээччилэринэн толоруллубут Кытай норуот остуоруйатын инсценировкатыттан саҕаланна. Салгыы «В музее» диэн педагогическай көрдөрүү буолла. Ону сэргэ семинар чэрчитинэн педагогтар «Learning Apps» — конструкторы туһаныыга, робототехникаҕа маастар-кылаастары ыыттылар.
Алексеева Надежда уонна Николаева Алена «Ньу-соль» профилактическай бырагыраамманы олоххо киллэрии туһунан сырдаттылар. Бу бырагыраамма оскуола иннинээҕи саастаах уонна улахан дьон доруобуйаларын таһымын үрдэтиигэ, кэтээн көрөр методиканы, айар уонна экспериментальнай-чинчийэр үлэҕэ туһаныыга туһуламмыт.
Семинар түмүгэр «Наставничество — путь к успеху» диэн төгүрүк остуол буолла, манна семинар кыттааччылара уопут атастастылар, санааларын үллэһиннилэр. Семинар бары тэрээһиннэрэ педагогическай үлэ хаачыстыбатын үрдэтиигэ уонна иитээччилэр профессиональнай таһымнарын сайыннарыыга туһуланан бэрт сэргэхтик ааста.
3
