Бүгүн улуустааҕы «малокомплектнай оскуола бастыҥ алын сүһүөх учуутала — 2024» куоҥкурус Маар-Күөл оскуолатыгар ыытылынна. Бу тэрээһин кыттааччыларга барыларыгар умнуллубат уопут буолла. Манна улуус араас оскуолаларыттан 6 учуутал кытынна. Бэлиэтээн эттэххэ, бу күрэс 2014 сылтан бэһис төгүлүн ыытыллар.
Куоҥкурус саҕаланыытыгар учууталлар уһулуччулаах маастырыстыбаларын уонна профессионализмнарын көрдөрөн аһаҕас уруоктары ыыттылар.
Тэрээһин дьоро аһыллыытыгар үөрэх салалтатын аатыттан информационнай-методическай отдел сүрүннүүр исписэлииһэ Маргарита Попова кыттааччыларга ситиһиилэри баҕаран туран, эҕэрдэ тылларын эттэ. Ону тэҥэ кыттааччылар педагогическай үлэ бэтэрээннэригэр бэлэх туттартаатылар.
Ол кэннэ учууталлар «медиавизитка» уонна «Айхал, сахам тылыгар!» түһүмэхтэри аастылар. Манна бэйэлэрин ситиһиилэрин уонна талааннарын көрдөрөр кыах бэрилиннэ. Тэрээһин хаамыытынан кыттааччылар интэриэһинэй маастар-кылаастары ыыттылар, онно мустубут дьон уопут атастаһан, саҥа ньымалары дьүүллэстилэр. Бу педагогтар билиилэрин кэҥэтэн, үөрүйэхтэрин тупсарар ньыма буолар.
Түмүккэ куоҥкурус сабыллыытын сиэрэ-туома ыытылынна. Маар-Күөл нэһилиэгин баһылыга Сергей Саввинов эҕэрдэ тылын этэн туран, тэрийээччилэргэ махталын биллэрдэ.
Дьүүллүүр сүбэ түмүгүнэн 3 истиэпэннээх лауреатынан Вера Ю (Толоон алын сүһүөх оскуолата) буолла. 2 истиэпэннээх — Карина Григорьева (Кэппэндээйи политехническай орто оскуолата), 1 истиэпэннээх лауреат — Зоя Федорова (Түбэй орто оскуолата) буолла. Куоҥкурус муҥутуур кыайыылаах аатын Маар-Күөл орто оскуолатын учуутала Алена Степанова ылла. Учууталларга кинилэр туйгун үлэлэрин иһин хайҕал суруктар туттарылыннылар.
Бу куоҥкурус учууталлар профессиональнай карьераларгар умнуллубат түгэн буолла.
