Бүгүн, Аан дойдутааҕы Оҕо көмүскэлин күнүгэр, Сунтаар нэһилиэгэр «Алмаз» стадиоҥҥа кэнчээри ыччакка аналлаах киэҥ ис хоһоонноох тэрээһиннэр буоллулар.
Манна аттракционнар, атыылар, быыстапкалар үлэлээн оҕо-аймах сэҥээриитин ыллылар. Бырааһынньык нэһилиэкпит уһуйааннарын, оскуолаларын выпускниктара кыттыылаах парадтарынан саҕаланна. Барыта 686 выпускник кыттыыны ылла.
Үөрүүлээх тэрээһини Сунтаар улууһун баһылыгын социальнай боппуруостарга уонна имиджевай политикаҕа солбуйааччы Гаврил Еремеев, Сунтаар нэһилиэгин баһылыга Эдуард Филиппов, үөрэх салалтатын салайааччытын солбуйааччы Владимир Уаров эҕэрдэ тылларынан арыйдылар. Манна бастыҥ үөрэнээччилэр бэлиэтэннилэр, улуус баһылыгын грамотатын туттулар. Ол кэннэ үөрэнээччилэр хордара ырыа бэлэх уунна.
Араас былаһааккаларынан оҕо саадтара, эбии үөрэхтээһин тэрилтэлэрэ уонна рддм, оҕо саас сирдьиттэрэ дьаһаллары тэрийдилэр: уруһуйга, плов астааһыҥҥа, IT-хайысхаҕа, искусствоҕа, ону сэргэ үөрэх профсоюһа босхо мороженай түҥэтэлээтэ. Оҕолор оонньууларга, күрэхтэргэ көхтөөхтүк кыттан, миннигэс бириистэри, бэлэхтэри ылан үөрүүлэрэ үксээтэ.
Быйылгы Оҕо көмүскэлин бырааһынньыга биир ураты сүүрээни саҕалаата. Ол курдук, нэһилиэк устун оҕолорго бэйэлэрин төрөөбүт Сунтаардарын туһунан интэриэһинэй чахчылары билэргэ-көрөргө оптуобуһунан экскурсия тэриллэн ыытылынна. Бырааһынньык кыттыылаахтара бары астынан, дуоһуйан бу бэлиэ күнү атаардылар.
