Бүгүн Сунтаар 3-с нүөмэрдээх оскуолатыгар учуутал күнүгэр аналлаах «Опыт – самый лучший наставник» диэн педагог-наставниктар ураты айымньылаах көрсүһүүлэрэ буолла. Тэрээһин үөрүүлээх аһыллыытыгар үөрэх салалтатын информационнай-методическай отделын сэбиэдиссэйэ Туяра Семенова киирии тылы эттэ, үөрэх салалтатын аатыттан улууспут бастыҥ Аҕа сүбэһиттэригэр Грамота туттартаата.
Ол кэннэ дьоҕуру уонна профессиональнай компетенцияны сайыннарыыга туһуламмыт маастар-кылаастар буоллулар. Бастакынан, Сунтаар 3-с нүөмэрдээх оскуолатын английскай тылын учуутала Николаева А.Н. «Тернистый путь молодого педагога» диэн тиэмэлээх маастар-кылааһы ыытта. Ангелина Николаевна уопутун үллэстэн, ону тэҥэ көдьүүстээх үөрэх эйгэни тэрийэргэ көмөлөһөр уруоктары ыытыы ньымаларын үллэһиннэ. Эдэр учууталы, бастатан туран, уопуттаах коллегаларын өттүлэриттэн өйөөһүн суолтатын бэлиэтээтэ. Иккис маастар-кылааһы Сунтаар алын сүһүөх оскуолатын учуутала Данилова Е.П. ыытта. Бу дьарыкка Елизавета Петровна эдэр коллегатын Семенов Семен Семеновиһы кытта бэйэлэрин булумньуларынан уонна ньымаларынан үллэһиннилэр. Ону сэргэ Сунтаар гимназиятын музыкаҕа учуутала Сергеева А. А. айар маастарыстыбаны ыытта. Алена Сергеева үөрэххэ музыкальнай элеменнэри туһаныы төрөөбүт тыл сайдарыгар көмөлөһүөн сөбүн көрдөрдө. Кини музыка уруоктарыгар да, уопсайынан үөрэх процеһыгар да туһаныллар практическай эрчиллиилэри көрдөрдө. Күндэйэ оскуолатын технологияҕа учуутала Трофянова Мария Алексеевна эдэр учуутала Меняков Арнольд Александровичтыын «Сайылык — саха киһитин эйгэтэ» диэн мастерскойун бары олус хайҕаатылар. Сунтаар 1 нүөмэрдээх оскуолатын методиһа Прокопьева Антонина Антоновна оскуола үөрэнээччилэригэр интерактивнай дьарыктары оҥорорго көмөлөһөр араас тиэхиникэни билиһиннэрдэ. Маастар-кылаастарга сылдьан учууталлар билиилэрин хаҥаттылар, саҥа ньымалары баһылаатылар.
Тэрээһин түмүгэр санаа атастаһыытыгар аналлаах үөрэх салалтатын информационнай-методическай отдел исписэлииһэ Татьяна Жиркова салалталаах төгүрүк остуол буолла. Манна сарсыҥҥыны былааннааһын боппуруостара дьүүллэһилиннилэр: саҥа үөрэх дьылыгар бэлэмнэнии, хаачыстыбалаах үөрэх эйгэтин хааччыйыыга ханнык көҕүлээһиннэри киллэриэххэ сөбүн ырыттылар. Кэпсэтиигэ Сунтаар 3-с нүөмэрдээх учуутала Васильев Семен Семенович эдэр учууталлар түмсүүлэрин салайааччыта наадатын уо. д. а. кыһалҕалары таарыйда, Сунтаардааҕы лиссиэй методиһа Тимофеева Мария Иннокентьевна уопутуттан үллэһиннэ.
Маннык көрсүһүү педагогическай эйгэ сайдыытыгар сүҥкэн оруоллаах. Учууталлар санааларын атастаһалларыгар, үөрэтиигэ саҥа ньымалары булалларыгар уонна бэйэлэрин кыахтарын сайыннаралларыгар көмө буолар.
