Сунтаар улууһун үөрэҕин управлениета эдэр учууталларга аналлаах ситимнээх үлэни ыытар. Учуутал идэтин талан ылбыт эдэр ыччат үүнэр көлүөнэни үөрэтиигэ-иитиигэ тутаах дьон буолаллар. Быйыл улууска 26 саҥа специалист үлэлэрин саҕалаатылар. Сунтаар улууһугар эдэр учууталлары кытары үлэ чэрчитинэн алтынньы ый 30 күнүгэр А.П.Павлов аатынан Сунтаар №1 орто оскуолатыгар педагогическай кылаастар үөрэнээччилэригэр уонна Сунтаар нэһилиэгин оскуолаларын эдэр учууталларыгар аналлаах «Дьоһуннааҕы кэпсэтии. Учуутал идэтин туһунан» тэрээһин үрдүк таһымнаахтык ыытылынна. Тэрээһини салайан ыытта Дмитрий Михайлов, А.П.Павлов аатынан Сунтаар №1 орто оскуолатын иитии үлэтигэр дириэктэри солбуйааччы.
РФ үөрэҕириитин бочуоттаах үлэһитэ, СР үөрэҕириитин туйгуна, педагогическай үлэ ветерана, педагог-наставник Людмила Игнатьева учуутал идэтин тула истиҥ дьоһуннаах кэпсэтиини ыытта. Кини бэйэтин педагогическай уонна общественнай үлэтин туһунан билиһиннэрдэ. Оҕо саас, оскуола, университет, учуутал үлэтэ, общественнай үлэ кэмнэриттэн кэпсээтэ уонна туһалаах сүбэлэри-амалары биэрдэ. Эдэр учуутал бастакы уруогун ыытарыттан саҕалаан дьыалабыай таҥнар таҥаһын, идэтин таһымын үрдэтиитигэр, үөрэнээччилэри үөрэтиигэ-иитиигэ, ону таһынан общественнай үлэҕэ дылы интэриэһинэй сүбэлэри сиһилии кэпсээтэ.
Тэрээһиҥҥэ педагогическай үлэ ветераннара, А.П.Павлов аатынан Сунтаар №1 орто оскуолатыгар директорынан үлэлээбит Николай Лидочен, Борис Герасимов; Людмила Ивановна үөрэппит үөрэнээччилэрэ: «Сунтарцеолит» тэрилтэ генеральнай дириэктэрэ Петр Попов, предприниматель Марфа Павлова уонна бииргэ алтыһан үлэлээбит кэллиэгэлэрэ кытыннылар.
Маннык хабааннаах тэрээһиннэр эдэр учууталларга уонна педагогическай кылаастар үөрэнээччилэригэр ыытыллаллара олус наадалаахтар. Людмила Ивановна курдук педагогическай үлэ ветераннара саҥа үлэлээн эрэр эдэр учууталларга настаабынньык буоланнар, кинилэргэ саҕалаабыт педагогическай үлэлэригэр айымньылаах аартыгы арыйаллар уонна күүс-көмө буолаллара үтүө түмүктэрдээх бигэ тирэҕи үөскэтэллэр.
Александра Павлова(Николаева)
