Бүгүн, ахсынньы 5 күнүгэр, М.И. Герасимов аатынан Сунтаардааҕы санаторнай оскуола 70 сыллаах үбүлүөйүгэр аналлаах Сунтаар улууһун алын кылаастарын уонна малокомплектнай оскуолалар эдэр учууталларыгар улуустааҕы сэминээр буолан ааста. Тэрээһин улуус араас үөрэх тэрилтэтиттэн эдэр учууталлары муста. Сүрүн сыалынан чэбдигирдэр үлэни кытта ыкса сибээстээх Сунтаар санаторнай оскуола учууталларын уонна иитээччилэрин үлэлэрин уопутун тарҕатыыга уонна тупсарыыга усулуобуйаны тэрийии буолла.
Сэминээр чэрчитинэн алын сүһүөх оскуолаҕа үөрэтии араас методическай ньымаларын уонна бастыҥ практиканы көрдөрөр аһаҕас уруоктар ыытылыннылар. Ол курдук, Захарова С.А. «Планирование хода решения задачи арифметическим способом» математика уруогун ыытан көрдөрдө. Маны кэккэ, иккис кылаастарга Филиппова Л.В. саха тылын уруога буолан ааста, үһүс кылаастарга алын кылаас учуутала Николаева М.С. үөрэнээччилэргэ естественнонаучнай грамотнаһы сайыннарыыга аналлаах «Экология на каждый день» диэн тиэмэҕэ уруок туруорда. Онтон оскуола дириэктэрин советнига Ермолаева Н.И. «Веселая переменка” оҕону переменаҕа туһалаахтык дьарыктыыр үөрүүлээх-көтүүлээх ньымалары көрдөрдө. Алын кылаас учуутала Григорьева Э.Е. уонна үрдүкү категориялаах музыка учуутала, СӨ үөрэҕириитин ситимин туйгуна Тимофеева М.В. «Зимние узоры» диэн тиэмэҕэ 1 кылаастарга интегрированнай уруок ыыттылар.
Ол кэннэ учууталлар идэтийиилэрин үрдэтиигэ туһуламмыт аһаҕас дьарыктар уонна маастар-кылаастар буоллулар: педагог-психолог Григорьева Э.Е. учууталларга психологическай тренинг тэрийдэ, педагог-логопед Николаева Т.И. нейродинамическай эрчиллиилэри билиһиннэрдэ. Уруок таһынааҕы дьарыктары көрдөрөр «Бииргэ сайдабыт» диэн интернат-оскуола иитээччилэринэн ыытыллыбыт комплекснай мастарыскыайга учууталлар көхтөөхтүк кытыннылар. Маны таһынан, кыттааччылар доруобуйаларын чэбдигирдэр процедуралары ыллылар – битэмииннээх чэй уонна кислороднай коктейль иһэн, массажка сылдьан, туус хоһугар сынньанан астынан бардылар.
Тэрээһин түмүгэр төгүрүк остуолга сэминээр кыттыылаахтара бэйэлэрин санааларын үллэһиннилэр. Бу курдук Сунтаардааҕы санаторнай оскуола кэллэктиибэ сэминээри үрдүк таһымҥа тэрийэн ыытта. «Ярмарка педагогических идей» Сунтаар улууһун алын кылаас эдэр учууталларын профессиональнай таһымнарын үрдэтиигэ, уопут атастаһыыга, педагогическай идиэйэлэри атастаһыыга тирэх буолар тэрээһин буолла.
