Ахсынньы 5 күнүгэр Кутана орто оскуолатыгар үөрэҕириигэ үлэлиир 10 эдэр салайааччы уонна 11 салайааччы дуоһунаһыгар резервэҕэ киирбит педагогтарга аналлаах «Эффективный менеджмент в образовательном учреждении» диэн «Үөрэх эйгэтин эдэр салайааччыларын оскуолалара» бырайыак чэрчитинэн семинар үрдүк таһымҥа ыытылынна. Семинар сыала-үөрэх тэрилтэлэрин салайыыга практическай уонна методическай өттүнэн үөрэтии уонна көмөлөһүү.
Семинары Сунтаар улууһун үөрэҕин управлениетын каадырынан хааччыйыы отделын салайааччыта Елена Егорова, оскуола иннинээҕи үөрэхтээһин отделын салайааччыта Мичийэ Михайлова, Кутана орто оскуолатын директора Владимир Архипов арыйдылар. Кыттааччылар аһаҕас уруоктары, функциональнай грамотность чэрчитинэн үлэни, ФГОС ирдэбилинэн кылаас таһынааҕы дьарыктары көрдүлэр, билистилэр. Кутана орто оскуолатын директора Владимир Архипов үлэтин опытыттан үллэһиннэ.
«Н.В.Крыжановская аатынан Мичээр» оҕо уһуйааныгар эдэр сэбиэдиссэйдэргэ уонна салайааччы дуоһунаһыгар резервэҕэ киирбит педагогтарга сэбиэдиссэй Зоя Федорова үлэтин опытыттан үллэһиннэ. Кыттааччылар аһаҕас дьарыктарга сырыттылар, үлэ чэрчитинэн төгүрүк остуол тула кэпсэтии тэрилиннэ.
Бары семинар кыттыылаахтарыгар кадровой делопроизводство, коррупцияны утары сокуон тула үөрэх ыытылынна. Тэрээһин түмүгэр Сунтаар улууһун үөрэҕин управлениетын каадырынан хааччыйыы отделын салайааччыта Елена Егорова, оскуола иннинээҕи үөрэхтээһин отделын салайааччыта Мичийэ Михайлова кыттааччыларга сертификат туттардылар.
Эдэр салайааччылар маннык хабааннаах үөрэх туһалааҕын уонна салгыы ыытылларыгар баҕа санааларын эттилэр. Аныгыскы семинар кулун тутар 5 күнүгэр Маар-Күөл орто оскуолатыгар ыытыллара былааннанар.
