Бүгүн, ахсынньы 10 күнүгэр, Г.Е. Бессонов аатынан Тойбохой орто оскуолатыгар «Единое образовательное пространство: новые возможности обучения и воспитания» тиэмэлээх 12-с республикатааҕы Бессоновскай педагогическай ааҕыылар ситиһиилээхтик ыытылыннылар. Тэрээһин оройуон араас үөрэх тэрилтэлэриттэн учууталлары уонна үөрэнээччилэри түмтэ. Барыта 120 кыттааччы. 41 кэтэхтэн кыттааччылар ортолоругар бааллар Анаабыр, Эбээн-Бытантай, Абый, Усуйаана, Булун, Томпо, Орто Халыма, Кэбээйи, Өлүөхүмэ улуустарын уонна Дьокуускай куорат учууталлара уонна үөрэнээччилэрэ. Сунтаар улууhуттан Кириэстээх, Сунтаар 1-кы, 3-с нүөмэрдээх оскуолалара, Сунтаар политехническай лиссиэйэ, Аллыҥа, Кэппэндээйи, Күүкэй, Куокуну, Маар-Күөл, Бүлүүчээн, Дьаархан, Тойбохой оскуолалара, Сунтаардааҕы ЦССВ, Сунтаар уонна Тойбохой «Ньургуhун» уһуйааннара актыыбынай кыттыыны ыллылар. Конференция үөрэнээччилэргэ 3 секциянан уонна учууталларга 2 секциянан ыытылынна.
Тэрийээччилэринэн СР үөрэҕин уонна наукатын министерствота, Сунтаар улууһун үөрэҕин салалтата, Тойбохой орто оскуолата, Г.Бессонов историческай-краеведческай комплекса буоллулар. Маннык киэҥ далааһыннаах бииргэ үлэлээһин республикаҕа үөрэхтээһин сайдыытыгар үрдүк суолтатын бэлиэтиир.
Ааҕыы сыала-соруга РФ биир кэлим үөрэх эйгэтин олоххо киллэрии усулуобуйатыгар уопут атастаһыыта, уһулуччулаах педагог Георгий Евдокимович Бессонов педагогическай нэһилиэстибэтин популяризациялааһын, ону тэҥэ оҕолору учуутал идэтигэр уһуйуу буолар. Тэрээһин чэрчитинэн учууталлар бэйэлэрин үлэлэригэр оскуола иннинээҕи, уопсай уонна эбии үөрэхтээһин салаатыгар бастыҥ практикаларынан үллэһиннилэр.
Конференция үөрүүлээх арыллыыта Г.Е. Бессонов аатынан Тойбохойдооҕу историческай-краеведческай комплексыгар ааста. Манна ааҕыылар кыттыылаахтарын үөрэх салалтатын сүрүннүүр исписэлииһэ Светлана Семенова, Тойбохой орто оскуолатын дириэктэрэ Айаал Тотонов уонна дириэктэри научнай-методическай үлэҕэ солбуйааччы Пальмира Леонтьева эҕэрдэлээтилэр, уопут атастаһыытын уонна үөрэх эйгэтигэр саҥа ыҥырыы суолтатын тоһоҕолоон бэлиэтээтилэр.
Ааҕыы сүрүн өттө секциялар үлэлэригэр ананна. Манна кыттааччылар үөрэх сайдыытын дьоһуннаах боппуруостарын дьүүллэстилэр, инновационнай бырайыактарын билиһиннэрдилэр уонна үлэ уопутун үллэһиннилэр. Үөрэнээччилэр көхтөөх кыттыылара кинилэргэ учуутал идэтин туһунан өйдөбүлү ыларга тирэх буолла.
Тэрээһин түмүгэр кыттааччылары наҕараадалааһын буолла. Секциялар кыайыылаахтара араас таһымнаах грамоталарынан наҕараадаланнылар, бары кыттааччылар сертификат ыллылар. Ол курдук, 79 кыттааччыттан 14-дэ үөрэх салалтатын грамотатынан, 21 — «Юные якутяне» грамотатынан, 14 кыттааччы — Тойбохой орто оскуолатын грамотатынан наҕараадаланнылар.
Республиканскай Бессоновскай ааҕыылар профессиональнай кэпсэтиигэ, уопут атастаһыыга уонна үөрэх процеһын салгыы тупсарыыга дьоһун суолталаах былаһааканан буолла. Тэрээһин аҥардас үөрэх эйгэтин сайыннарыыга эрэ буолбакка, Г.Е. Бессонов педагогическай нэһилиэстибэтин аатын үйэтитиигэ ананна. Кыттааччылар бэлиэтииллэринэн, кинилэр саҥа билиини хаҥатан, үөрүйэхтэри ылан, коммуникативнай уонна дьыалабыай хаачыстыбаны сайыннардылар.
Ааҕыы кыттыылаахтарын барыларын ситиһиилэринэн эҕэрдэлиибит! Салгыы саҥа интэриэһинэй бырайыактары олоххо киллэриигэ баҕарабыт!
