Ахсынньы 13 күнүгэр А.П. Павлов аатынан Сунтаар 1-кы нүөмэрдээх орто оскуолатыгар Сунтаар улууһун 3 сылга диэри стажтаах эдэр учууталларыгар аналлаах «ВМЕСТЕ МЫ – СИЛА» диэн коммунарскай сбор ыытылынна.
Тэрээһини Сунтаар улууһун үөрэҕин салалтата уонна «СунАМП» эдэр учууталлар ассоциациялара ыыттылар. Сүрүн сыалынан эдэр учууталлар идэлэрин таһымын үрдэтии, уопут уонна бастыҥ практика атастаһыыта, ону тэҥэ кинилэр олохторугар уонна профессиональнай үүнүүлэригэр сөптөөх усулуобуйаны тэрийии буолла.
Түмсүүгэ улуус араас нэһилиэктэриттэн (Дьаархан, Илимниир, Элгээйи, Устье, Куокуну, Түбэй, Бүлүүчээн, Кэппэндээйи, Сунтаар) 25 учуутал кыттыыны ылла. Регистрация кэнниттэн кыттааччылар түөрт хамаандага араҕыстылар: Космос, Новатордар, Взлет, Барси. Тэрээһин үөрүүлээх арыллыытыгар Нина Павлова (Сунтаар улууһун үөрэҕин профсоюһун бэрэссэдээтэлэ), Дьулустаан Иванов (Сунтаар улууһун ыччат политикатын отделын начальнигын солбуйааччы), Александра Павлова (Сунтаар улууһун үөрэҕин салалтатын кадрынан хааччыйыы отделын сүрүннүүр исписэлииһэ), Афанасий Матвеев (А. П. Павлов аатынан Сунтаар 1-кы нүөмэрдээх орто оскуола дириэктэрэ) уонна Сардаана Никитина («СунАМП» ассоциация төрүттээччитэ) кыттыыны ыллылар.
Ол кэннэ хамаандалар биэс станциянан көхтөөх тургутууну аастылар: «Детство”, “Школа”, “Студенчество”, “Армия”, “Работа”. Хас биирдии станция араас сатабыллары, логиканы уонна реакцияны сайыннарар оонньуулартан турда. Оонньуу түһүмэҕин кэнниттэн хамаандалар эдэр учууталларга аналлаах бырайыактары оҥорууга киирдилэр.
Дьүүллүүр сүбэ түөрт бырайыагы сыаналаатаа. Ол курдук: «Методичка для молодого педагога» (команда «Барси»), «Лагерь-семинар для молодых педагогов» («Новаторы»), «Лагерь для молодых педагогов» («Взлёт»). Көмүскээһин түмүгүнэн бастакы миэстэни «Барси» хамаандата, иккис – «Влет», үсүһү – «Космос» хамаандата ыллылар.
Маны таһынан номинациялар туттарылыннылар:
* Генератор идей: Камелия Васильевна Генерова, ССОШ № 1;
* Талант вечера: Аина Сергеевна Бекянова, ССОШ №1;
* Сила команды: Эрчим Михайлович Семёнов, Бүлүүчээн лиссиэйэ;
* Педагогическое открытие: Дарина Николаевна Егорова, Илимниир орто оскуолата;
* Создатель настроения: Юлия Николаевна Лаптева, Элгээйи орто оскуолата.
Бу курдук улуустааҕы коммунарскай сбор Сунтаар улууһун эдэр учууталлара ситиһиилээхтик үлэлииллэригэр көмөлөһөр көдьүүстээх былаһаакка буолла. Тэрээһин бэрт сэргэхтик ааспытын кыттааччылар бэлиэтээтилэр. Эдэр педагогтар бэйэлэригэр туһалааҕы ылбыттара, элбэх саҥаны билбиттэрэ буолуо диэн эрэнэбит. Кинилэргэ ситиһиини, таһаарыылаах үлэни, үүнүүнү-сайдыыны баҕарабыт!
