Ахсынньы 17-18 күннэригэр В.Г. Павлов аатынан Сунтаар алын сүһүөх оскуолатыгар икки тыллаах (билингвальнай) үөрэхтээһин усулуобуйатыгар төрөөбүт тылынан ааҕыы сатабылын тэрийиигэ анаммыт алын кылаас учууталларын квалификацияларын үрдэтэр икки күннээх куурус 117 киһини хабан ыытылынна.
Кууруһу СР наукаларын Академиятын Арктическай научнай-чинчийэр киинин научнай сотрудниктара, педагогическай наука кандидата Светлана Семенова уонна Наталья Спиридонова ыыттылар. Кыттааччылар иннилэригэр 1-4 кылаас үөрэнээччилэригэр саха тылынан ааҕыы сатабылын үрдэтэргэ уонна бу үөрүйэхтэри нуучча тылын уонна литературатын, математиканы уонна тулалыыр эйгэни үөрэтиигэ методическай компетенцияны күүһүрдэр сорук турбута.
Программа киэҥ хабааннаах тиэмэҕэ хабылынна. Үөрэх үлэһиттэригэр анаммыт үлэ төгүрүк остуолтан саҕаланна. Мунньахха үөрэх салалтатын салайааччыта Борис Васильев, үөрэх салалтатын информационнай-методическай отделын сүрүннүүр исписэлииһэ Маргарита Попова уонна оскуола дириэктэрэ Гаврил Еремеев кыттыыны ыллылар. Манна Россия үөрэнээччилэрин ааҕыыга ситиһиилэрин динамикатын дьүүллэстилэр. Учууталлар маны быһаарыы суолларын туһунан билиини ыллылар, бэйэлэрин санааларын үллэһиннилэр.
Светлана Семенова билингвальнай эйгэҕэ функциональнай грамотнаһы тэрийии уратытын туһунан кэпсээтэ. Кини алын сүһүөх оскуолаҕа туттуллар тиэкистэр көрүҥнэригэр, үөрэнээччилэр ааҕар-суоттуур кыахтарын учуоттаан, ону сэргэ оҕо лингвистическай дьоҕурун сабыдыалыгар тохтоон сиһилии быһаарда. Оскуола иннинээҕи, алын үөрэх икки ардыларыгар утумнааһын уонна, биллэн турар, оҕолору ааҕыыга угуйааһын боппуруостарыгар улахан болҕомто уурулунна. Лектор литературнай ааҕыы уонна тулалыыр эйгэ уруоктарыгар уустук быһыыны-майгыны практическай ырытыынан үлэтин түмүктээтэ.
Наталья Спиридонова Саха сиригэр математическай үөрэххэ, семантика уонна синтаксис көрүүтүнэн алын сүһүөх оскуола учебниктарын уратыларын ырытан, икки тыллаах сыһыаҥҥа үлэтин анаата. Спиридонова Н. И. үөрэнээччилэргэ уустук математическай соруктары судургутутуу ньымаларыгар болҕомтотун уурда. Практическай чааһыгар математикаҕа ааҕыы сатабылын сайыннарыыга туһаайыллыбыт соруктары ырытан оҥордо.
Куурус иккис күнүгэр Наталья Ивановна математическай сатабылга норуоттар икки ардыларынааҕы чинчийии түмүгэр аналлаах төгүрүк остуол тэрийдэ. Учууталлар уопут атастастылар уонна сүрүн кыаһалҕалары дьүүллэстилэр.
Бу икки күннээх дириҥ ис хоһоонноох кууруска сылдьан учууталлар элбэх үөрүйэхтэри ыллылар, үлэлэригэр туһалааҕы иҥэриннилэр. Куурус кыттыылаахтара практическай хайысханы уонна туруоруллубут информация актуальноһын үрдүктүк сыаналаатылар. Ылбыт билиилэрэ-көрүүлэрэ, дьоҕурдара үөрэнээччилэригэр ааҕыы сатабылын ордук таһаарыылаахтык тэрийэллэригэр, төрөөбүт тылы сайыннаран иһэллэригэр көмө буолуо диэн эрэнэбит.
