Бүгүн, ахсынньы 25 күнүгэр, Сунтаар политехническэй лиссиэй «Ай-Сатаа» технопаркатыгар «Кадры для беспилотных авиационных систем» федеральнай программа чэрчитинэн БАС (ыраахтан салайыллар авиационнай тиһиктэр) кабинетын үөрүүлээх быһыыга-майгыга арыйдылар. Бу – улууспутугар техническэй үөрэхтээһин сайдыытыгар уонна инники технологияларга идэтийбит исписэлиистэри бэлэмнээһиҥҥэ улахан суолталаах хардыы буолар.
Эҕэрдэ тылын Сунтаар улууһун баһылыга Анатолий Григорьев эттэ, үөрэнээччилэр саҥаны баһылаан сайда туралларыгар баҕарда. «БАС кабинетын арыллыыта – лиссиэйгэ ирдэбиллээх үөрүйэхтэри, компетенцияны ыларга тирэх суолталаах түгэн, — диэн үөрэх салалтатын салайааччыта Борис Васильев бэлиэтээн эттэ, — Бу үөрэнээччилэр инженернэй толкуйдарын уонна профориентацияны сайыннарыыга үчүгэй стимул буолуо диэн эрэнэбит.» Ыалдьыттар уонна үөрэнээччилэр иннилэригэр эҕэрдэ тылыгар лиссиэй дириэктэрэ Олег Сосин бу бырайыак инникитин үөрэх процеһыгар дьоһуннааҕын тоһоҕолоон бэлиэтээтэ, кабинеты тэрийиигэ кыттыбыт дьоҥҥо махталын биллэрдэ, өйдөбүнньүк сувенир биэрдэ.
Тэрээһин арыллыытын кэнниттэн тута экскурсия тэрилиннэ. Манна БАС управлениетын программанан хааччыйыы үлэлэрин, аныгы аппараттары көрдүлэр. Экскурсияҕа сылдьан улуус баһылыга Анатолий Григорьев тыа хаһаайыстыбатыгар уоҕурдууну киллэриигэ ураты интэриэһи биллэрдэ. «Бу технология тыа хаһаайыстыба үлэтин көдьүүһүн биллэрдик үрдэтиэхтэрин сөп уонна ороскуоттарын намтатыахтарын сөп», — диэтэ, улуус уонна регион экономикатыгар инновациялары киллэриигэ туһалааҕын бэлиэтээтэ. Мантан иннэ Сунтаар политехническэй лиссиэй үөрэнээччилэрэ, ону сэргэ улууспут атын үөрэх тэрилтэлэриттэн баҕалаахтар ыраахтан салайыллар авиационнай тиһиктэри көтүтэргэ, салайарга уонна программалыырга үөрэниэхтэрэ, көтөр аппараттары бэйэлэрэ оҥорон көтүтүөхтэрэ.
