Бүгүн, тохсунньу 10 күнүгэр, үгэс буолбут улуус Аҕа баһылыгын Ороһуоспатааҕы харыйата бүтүн улуустан 101 оҕону муста. Үөрүүлээх тэрээһиҥҥэ туйгун үөрэхтээх, улуустааҕы, өрөспүүбүлүкэтээҕи, Арассыыйа уонна норуоттар икки ардыларынааҕы спортивнай күрэхтэргэ, араас куонкурустарга, олимпиадаларга үрдүк ситиһиилээх үөрэнээччилэр кыттыыны ыллылар.
Бырааһынньык оҕолор түмсэллэригэр, уопут атастаһалларыгар аналлаах араас хайысхаларынан маастар-кылаастартан саҕаланна. Көхтөөх оонньуулар уонна куонкурустар доҕордоһуу эйгэтин тэрийдилэр. Ол кэннэ «Былааһы кытта кэпсэтии» буолла. Сунтаар оройуонун тэрилтэлэрин салайааччылара оҕолору кытта аһаҕас дискуссияҕа көрүстүлэр. Үөрэнээччилэр интэриэһиргиир ыйытыктарын биэрдилэр, санааларын-этиилэрин үллэһиннилэр.
Тэрээһин үөрүүлээх чааһа «Үтүө санаалаах Мэхээлэ уол» мюзикл-остуоруйатынан аһылынна. Баһылык Анатолий Григорьев мустубут оҕолору эҕэрдэ тылынан көрүстэ, ситиһиилэрин бэлиэтээн салгыы сайдалларыгар баҕа санаатын эттэ, ону тэҥэ өйдөбүнньүк бэлэх туттарда. Тэрээһин уопсай хаартыскаҕа түһээһининэн, фуршетынан түмүктэннэ. Оҕолорго саҥа үөрэх чиэппэригэр ситиһиилэри, улуус общественнай олоҕор инникитин даҕаны актыыбынай кыттыыны баҕарабыт!
