
Бу күннэргэ С.А. Зверев аатынан норуот айымньытын киинигэр «Там, где танцуют стерхи» киинэни көрдөрдүлэр. Манна «Кустугу ситтэрбин» кинигэ ааптара, биллиилээх чинчийээччи, фотограф, суруйааччы Иван Дьячковскай — Кыталык Уйбаан кыттыыны ылла. Киинэ быыһыгар кини үлэтин билиһиннэрэр быыстапка тэрилиннэ.
Маны таһынан, оскуолаларга уонна уһуйааннарга нэдиэлэ устата ааптары кытта көрсүһүүлэр тэрилиннилэр. Кини үөрэнээччилэргэ айан сырыыларын, айылҕаҕа тапталын кэпсээтэ. Бу көрсүһүүлэр үүнэр көлүөнэ билиилээх-көрүүлээх буолалларыгар ананан ыытылыннылар. «Ыччат биһиги айылҕабытын сыаналыыр, харыстыыр буолара – бу миэхэ олус улахан суолталаах» – диэн Кыталык Уйбаан бэлиэтээн эттэ.
Үөрэх салалтатын аатыттан Иван Дьячковскайга истиҥ махталбытын тиэрдэбит. Бу көрсүһүүлэр оҕолор айылҕаҕа, айар үлэҕэ, чинчийиигэ интэриэстэрэ сайдарыгар көмөлөһүө диэн эрэнэбит.




