«Путь к успеху!» куонкурус

Бүгүн, тохсунньу 28 күнүгэр, Сунтаар 3 нүөмэрдээх орто оскуолатыгар «Путь к успеху!» эдэр учууталлар куонкурустара үрдүк таһымҥа буолан ааста. Талааннаах уонна кэскиллээх учууталлары арыйыыга уонна өйөөһүҥҥэ туһуламмыт куоҥкурус быйыл улууспут араас үөрэх тэрилтэлэриттэн 12 кыттааччыны түмтэ.

Учууталлар үс түһүмэҕи аастылар: аһаҕас уруокка үөрэнээччилэри кытта хардарыта алтыһыы уонна аныгы үөрэх технологияларын туһаныы үөрүйэхтэрин көрдөрдүлэр. Иккис түһүмэх – бэйэлэрин билиһиннэрэн, талааннарын арыйдылар. Үсүһүнэн аһаҕас кэпсэтии буолла – аныгы педагог иннигэр тирээн турар суолталаах кыһалҕалары дьүүллэстилэр. Бу учууталлар санааларын истэргэ дьоһуннаах былаһаакка буолла.

Экспертэр истэригэр уопуттаах педагогтар, Сунтаар улууһун ыччат бэлиитикэтин уонна үөрэх салалтатын бэрэстэбиитэллэрэ, үөрэх үлэһиттэрин профсоюһун бэрэссэдээтэлэ киирдилэр.
Ол курдук, «Путь к успеху!» куоҥкурус кыайыылаахтарын уонна призердарын ааттара:
3 истиэпэннээх дипломант буолла – Ноговицын Станислав Александрович,
 Л. Попов аатынан Арыылаах агро хайысхалаах оскуола информатикаҕа учуутала.
2 истиэпэннээх дипломант – Аина Сергеевна Бекянова,
 А.П. Павлов аатынан Сунтаар 1 нүөмэрдээх оскуола биологияҕа уонна географияҕа учуутала.
1 истиэпэннээх дипломант – Елена Алексеевна Олесова,
 Сунтаардааҕы анал коррекционнай оскуола учуутала.

Кыйыылаах үрдүк аатын ылла – Мария Семеновна Слепцова, Сунтаардааҕы гимназия нуучча тылын уонна литературатын учуутала.

Ону тэҥэ анал ааттар бэлиэтэннилэр:
«Педагогический дебют» анал аат – Алина Степановна Корякина, Бүлүүчээн лиссиэйин ИЗО-ҕа учуутала.
«Творческое вдохновение» анал аат – Иван Александрович Иванов, П.Х. Староватов аатынан Элгээйи орто оскуолатын труд учуутала.
«Путь к совершенству» анал аат – Эльмира Александровна Надык, Сунтаардааҕы лиссиэй нуучча тылын уонна литературатын учуутала.

Куоҥкурус кыайыылаахтара уонна призердара дипломунан уонна бирииһинэн наҕараадаланнылар. Ону таһынан, Мария Семеновна Слепцова үөрэх үлэһиттэрин профсоюһуттан алта тыһыынчалаах сертификат тутта. Үөрэх салалтатын аатыттан бары кыттааччыларга, жюри чилиэннэригэр уонна тэрийээччилэргэ барҕа махталбытын тиэрдэбит. Эдэр учууталларбыт үөрэх сайдыытыгар боччумнаах кылааттарын киллэриэхтэрэ диэн эрэнэбит.

Добавить комментарий