Үөрэх үлэһиттэрин олунньутааҕы сүбэ мунньаҕын чэрчитинэн оскуола иннинээҕи үөрэхтээһин боппуруостарыгар аналлаах үһүс былаһаакка үлэтин түмүктээтэ. Үөрэх салалтатын оскуола иннинээҕи отделын сэбиэдиссэйэ Мичийэ Михайлова оскуола иннинээҕи үөрэхтээһин хаачыстыбатын үрдэтиигэ саҥа ньымалар туһунан дакылааты билиһиннэрдэ.
Былаһаакка үлэтэ СӨ үөрэҕин үлэһиттэрин тохсунньутааҕы мунньаҕыгар олоҕуран уопсай иһитиннэрииттэн саҕаланна. Өрөспүүбүлүкэҕэ үөрэх сайдыытын уонна оскуола иннинээҕи үөрэхтээһин приоритеттарын сүрүн хайысхалара этилиннилэр.
3 нүөмэрдээх «Чебурашка» оҕо сайдар киин бэрэстэбиитэллэрэ «Орлята-дошколята» программаны олоххо киллэриигэ уопуттарын үллэһиннилэр.
Ону тэҥэ төрөөбүт тылы харыстааһын уонна сайыннарыы боппуруостарыгар ураты болҕомто ууруллунна. Кыттааччылар ийэ тылга тапталы иитиигэ төрөппүттэр, оҕо саада уонна оскуола биир сомоҕо буолуутун дьүүллэстилэр. Төрөппүттэри оҕолору төрөөбүт тылынан үөрэтии процеһыгар көхтөөхтүк кыттыы наадатын бэлиэтээтилэр.
Былаһаакка үлэтин түмүктүүрүгэр мунньах кыттыылаахтара санааларын атастастылар, этиилэрин үллэһиннилэр.
Үлэ түмүгүнэн оскуола иннинээҕи үөрэх тэрилтэлэрин үлэлэрин тупсарыыга, үөрэх хаачыстыбатын үрдэтиигэ уонна оҕо саада, оскуола, дьиэ кэргэн икки ардыларыгар сибээһи бөҕөргөтүүгэ рекомендация оҥоһулунна. Мунньахха этиллибит рекомендациялар 2025 сыллааҕы үлэтин былаанын толорууга учуоттаныахтаах.
