«Партизан» Норуот айымньытын киинигэр тус сыаллаах былаһааккалар үлэлэрин кэнниттэн Сунтаар улууһун үөрэҕин үлэһиттэрин олунньутааҕы сүбэ мунньаҕа «Тенденции развития системы образования Сунтарского улуса: организация профильного обучения как приоритетная задача развития» диэн сүрүн тиэмэҕэ анаммыт пленарнай мунньаҕа түмүктэннэ. Манна барыта 155 педагогическай үлэһит кыттыыны ылбыта бэлиэтэнэр.
Улуус баһылыга Анатолий Григорьев улуус социальнай-экономическай сайдыытыгар үөрэх тиһигин сайыннарыы стратегическай суолтатын тоһоҕолоон бэлиэтээтэ уонна кэлэр көлүөнэ кэскилигэр педагогическай үлэһиттэр сүрүн оруолларын бэлиэтээтэ. Баһылык ГИА-ны туттарыыга ураты болҕомто ууруллуохтааҕын, сүрүн математика, химия, физика, информатика предметтэрин күүһүрдүөххэ наадатын эттэ.
Сунтаар улууһун үөрэҕин систематын туругун уонна кэскилин туһунан дакылааты үөрэх салалтатын салайааччыта Борис Васильев оҥордо. Дакылаакка үлэ сүрүн хайысхаларын билиһиннэрии, 2025 сылга соруктар туруорулуннулар, ону тэҥэ статистическай дааннайдар уонна үөрэх үлэлэрин көдьүүһүн ырытыы ааҕылынна. Улуус үөрэҕин тиһигин иннигэр турар сүрүн ыҥырыылар бэлиэтэннилэр.
Тустаах үөрэхтээһин боппуруоһугар ураты болҕомто ууруллунна. Уопсай үөрэхтээһин отделын сүрүннүүр исписэлииһэ Светлана Иванова улууска профильнай үөрэхтээһин билиҥҥи туругун сиһилии ырытан билиһиннэрдэ, кыһалҕалары бэлиэтээтэ уонна системаны тупсарыыга чопчу дьаһаллары ыларга этии киллэрдэ. Профильнай кылаастарга үлэлиир педагогическай кадрдары бэлэмнээһин боппуруоһугар ураты болҕомто уурулунна.
Профильнай үөрэҕи тэрийиигэ уопутун Сунтаар политехническай лиссиэй дириэктэрэ Олег Сосин үллэһиннэ. Олег Константинович оҕолор кыра моторикаларын, тылынан, суругунан этиилэрин сайыннарыахха наадатын бэлиэтээтэ.
Тыа сиригэр политехническай үөрэҕи сайыннарыы боппуруостарыгар Кириэстээх политехническай оскуолатын дириэктэрэ Евгений Тараяров кэпсээтэ. Политехническай хайысхалаах оскуолалар ситимнэрин үлэтин билиһиннэрдэ.
А.П. Павлов аатынан Сунтаар 1 №-дээх оскуола иитэр-үөрэтэр үлэҕэ дириэктэри солбуйааччы Валентина Николаева боппуруоһу учууталлар профессиональнай маастарыстыбаларын үрдэтиигэ уонна кинилэр анал үөрэхтэрин маршруттарын өйөөһүҥҥэ туһаайда.
Иитии уонна эбии үөрэхтээһин отделын сэбиэдиссэйэ Александра Павлова биир ньыгыл иитии уонна эбии үөрэхтээһин тиэмэҕэ кэпсээтэ. Дакылаакка дьиэ кэргэн, оскуола уонна эбии үөрэхтээһин тэрилтэлэрин күүһүн тэрийии концепцията көрүлүннэ. Ону таһынан, үөрэх тэрилтэлэригэр патриотиеческай иитиигэ күүстээх үлэ барыахтааҕын бэлиэтээтэ.
Салгыы Сунтаар улууһун үөрэҕин бастыҥ үлэһиттэрин наҕараадалааһын үөрүүлээх сиэрэ-туома ыытылынна. Наҕараадалар бэйэлэрин үлэлэригэр үрдүк профессионализмы уонна бэриниилээх буолууну көрдөрбүт, үөрэх тиһигин сайыннарыыга дьоһун кылааты киллэрбит учууталларга туттарылыннылар.
Сунтаар улууһун үөрэҕин салалтата сүбэ мунньах кыттыылаахтарыгар улуус үөрэҕин тиһигин сайыннарыыга дьоһун суолталаах боппуруостары дьүүллэһиигэ кылааттарын иһин барҕа махталын биллэрэр.
