Бүгүн А.П. Павлов аатынан Сунтаар 1 нүөмэрдээх оскуолатын физическэй культура учуутала, анал байыаннай дьайыы кыттыылааҕа, хорсун быһыы уордьан кавалера, хотугу многоборьеҕа Саха сирин спордун маастара Артур Эдуардович Гермогенов сырдык аатыгар 8, 9, 10 уонна 11 кылаас үөрэнээччилэригэр троеборьеҕа күрэхтэһии аһыллыыта буолла. Уолаттар гиря көтөҕүүтүгэр, үс төгүл ыстаныыга уонна наартаны ойууга күөн көрсүөхтэрэ.
Бу тэрээһин спорт күрэхтэһиитэ эрэ буолбакка, үүнэр көлүөнэни иитиигэ үлэтин анаабыт, оҕолору спорка уонна чөл олоххо уһуйбут, төрөөбүт дойдутугар ытык иэһин чиэстээхтик толорбут патриот буойуҥҥа ытыктабыл бэлиэтэ буолар. Көрөөччү саалатыгар үөрэнээччилэр, оскуола педагогическай кэллэктиибэ, ону тэҥэ бочуоттаах ыалдьыттар, кинилэр ортолоругар Артур Гермогенов аймахтара муһуннулар. Ийэтин, кэргэнин, оҕолорун, быраатын сирэйдэригэр хомолто уонна курус санаа, ону кытары кини хорсун быһыытын, ситиһиилэрин иһин киэн туттуу көстөрө.
Күрэхтэһии аһыллыытыгар үөрэх салалтатын салайааччыта Борис Васильев Артур Гермогеновы оскуолаҕа уонна улууска физическэй культура уонна спорт сайдыытыгар тугунан да сыаналаммат кылаатын, кини үлэтигэр бэриниилээх буолуутун уонна моральнай хаачыстыбаларын бэлиэтээтэ. «Бу күрэхтэһии эдэр ыччаты төрөөбүт дойдуну таптыырга уонна ытыктыырга, чөл олоххо тардыһыыга көҕүлүө диэн эрэнэбит. Итиэннэ оскуола эркиниттэн улуус таһымыгар сылын аайы ыытыллар тэрээһиннэргэ тахсарыгар үлэлэһиэхпит», — диэтэ.
Үөрэх салалтата бу тэрээһин ыччаты патриотическай иитиигэ уонна чөл олоҕу пропагандалааһыҥҥа оскуола уонна улуус олоҕор улахан суолталаах түгэн буолуоҕа диэн эрэнэр.
