Олунньу 27 күнүгэр Сунтаар улууһугар оскуола иннинээҕи үөрэхтээһин тиһигэр — улуустааҕы профессиональнай «Сыл бастыҥ иитээччитэ — 2025» куонкурус үлэтин саҕалаата. Манна барыта улуус араас уһуйааннарыттан 8 педагог кыттыыны ылар.
Куонкурус бастакы күнэ «Педагогическое мероприятие с детьми» диэн иккис түһүмэххэ ананна. Кыттааччылар бэйэлэрин үөрүйэхтэрин, сатабылларын араас саастаах оҕолорго сөп түбэһиннэрэн көрдөрдүлэр. Бастакы түһүмэх кэтэхтэн ыытыллыбыта. Онно бэйэлэрин визиткаларын, бырайыактарын билиһиннэрбиттэрэ.
Кыттааччылар икки былаһаакканан күрэхтэстилэр: Сунтаар 5 нүөмэрдээх «Ньургуһун» уонна 7 нүөмэрдээх «Солнышко» иитиллээччилэригэр аһаҕас дьарыктар буоллулар. Педагогтар орто уонна бэлэмнэнии бөлөхтөргө, оҕолорго саҥа билиини-көрүүнү биэрэн, умсугуйан үлэлээтилэр.
Күн иккис аҥарыгар, куонкурус үөрүүлээх аһыллыытыгар, үөрэх салалтатын салайааччыта Борис Васильев уонна оскуола иннинээҕи үөрэхтээһин отдел салайааччыта Мичийэ Михайлова эҕэрдэ тылларын эттилэр, кыттааччыларга ситиһиини, таһаарыылах үлэни баҕардылар.
Бастакы күн түмүгүнэн финалистары иһитиннэрдилэр. Ол кэннэ тута куонкурус үһүс түһүмэҕэ — маастар-кылаас көрдөрүүтэ саҕаланна. Лауреаттар бэйэлэрин ураты методикаларын көрдөрдүлэр, коллегаларын кытта уопуттарын үллэһиннилэр. Ол курдук, Сунтаар 5 нүөмэрдээх «Ньургуһун» уһуйаан эбии үөрэхтээһин педагога Игнат Федоров оҕону, тулуурдаах, түргэн-тарҕан буоларга үөрэтэр, сайыннарар «Байанай бэлэҕэ» диэн сүрдээх интэриэһинэй оонньуутун билиһиннэрдэ. Сунтаар 4 нүөмэрдээх «Березка» уһуйаан иитээччитэ Антонина Колесова мнемотехника көмөтүнэн оҕо саҥарар саҥатын сайыннарыыга анаммыт үлэтин кэпсээтэ. 11 нүөмэрдээх «Кыталык» оҕо сайдар киин эбии үөрэхтээһин педагога Диана Корнилова дьарыгы хайдах интэриэһинэй гына ыытыахха сөбүн туһунан бэйэтин авторскай үлэтин уопутуттан үллэһиннэ.
Сарсын, олунньу 28 күнүгэр, кэтэхтэн төрөппүттэргэ аналлаах сэминээр уонна профессиональнай кэпсэтии түһүмэхтэрэ ыытыллыахтара. Кыттааччыларга барыларыгар ситиһиилэри баҕарабыт!
